విషాదం: తలపై క్రికెట్​ బ్యాట్​ పడి విద్యార్థి మృతి

కేరళ మావెలిక్కరలోని ఓ ప్రభుత్వ పాఠశాలలో విషాద ఘటన జరిగింది. మధ్యాహ్నం భోజనం అనంతరం చేతులు కడుక్కోవడానికి వెళ్లిన విద్యార్థి తలకు క్రికెట్​ బ్యాట్ బలంగా తాకడం వల్ల అతడు అక్కడిక్కడే కుప్పకూలిపోయాడు. అతడిని ఆసుపత్రికి తరలించగా.. అప్పటికే ప్రాణాలు కోల్పోయాడని వైద్యులు స్పష్టం చేశారు.

కేరళలో పాము కాటుతో విద్యార్థిని మృతి చెందిన ఘటనను మరువకముందే మరో విషాదం చోటుచేసుకుంది. మావెలిక్కర ప్రాంతంలోని ఓ పాఠశాలలో.. అకస్మాత్తుగా తలపై బ్యాట్​ పడటం వల్ల ఓ విద్యార్థి ప్రాణాలు కోల్పోయాడు. మధ్యాహ్నం భోజనం ముగించుకుని చేతులు కడుక్కోవడానికి వెళుతుండగా ఈ ఘటన జరిగిందని పాఠశాల వర్గాలు తెలిపాయి.

ఇదీ జరిగింది...

మావెలిక్కరలోని చునక్కర ప్రభుత్వ పాఠశాలలో మధ్యాహ్న భోజనాన్ని ముగించుకొని చేతులు కడుక్కొవటానికి వెళ్లాడు 6వ తరగతి విద్యార్థి నవనీత్. అదే సమయంలో పాఠశాల మైదానంలో క్రికెట్ ఆడుతున్నారు తోటి విద్యార్థులు.

ఓ విద్యార్థి చేతిలో నుంచి బ్యాట్ జారి నవనీత్ తల వెనుక భాగాన్ని బలంగా తాకింది. ఉన్న చోటే అతను కుప్పకూలిపోయాడు నవనీత్​. పాఠశాల ఉపాధ్యాయులు అతడిని ఆసుపత్రికి తరలించారు. కానీ అప్పటికే నవనీత్ మరణించినట్లు వైద్యులు తెలిపారు.

ఈ ఘటనపై పోలీసులు కేసు నమోదు చేసి విచారణ చేపట్టారు.

ఇదీ చూడండి: తప్పిపోయాడనుకుంటే నెదర్లాండ్స్​లో ప్రత్యక్షమయ్యాడు..!