వివాదాస్పద పౌరసత్వ సవరణ చట్టంపై దేశ రాజధాని దిల్లీ, బంగాల్, ఈశాన్య రాష్ట్రాలు సహా అనేక ప్రాంతాల్లో నిరసనలు కొనసాగుతూనే ఉన్నాయి. పొరుగుదేశం వారికి భారత్లో పౌరసత్వం కల్పించే ఈ చట్టంపై ఇప్పటికే పలు రాష్ట్రాలు, రాజకీయ పార్టీలు తమ విధానాన్ని స్పష్టం చేశాయి. ఈ నేపథ్యంలో పార్టీల వైఖరి..
ఈశాన్యాన పార్టీల తలోదారి...
పౌరసత్వ చట్టంపై ఈశాన్య రాష్ట్ర ప్రాంతీయ పార్టీలు, అధికార ప్రభుత్వాల్లో తలో మాట వినిపిస్తోంది. అసోంలో భాజపా మిత్రపక్షం.. అసోం గణ పరిషత్ ఇప్పటికే ఈ చట్టానికి వ్యతిరేకంగా తమ గళం వినిపించింది. సుప్రీం కోర్టుకు వెళ్లేందుకు సిద్ధమైంది. అయితే.. ఆ పార్టీ ఇంకా భాజపాకు సన్నిహితంగానే ఉందని వార్తలు వినిపిస్తున్నాయి.
అసోం: ఏఐడీయూఎఫ్ పౌరచట్టాన్ని సంపూర్ణంగా వ్యతిరేకిస్తోంది. ఈ పార్టీ నుంచి ధుబ్రి లోక్సభకు ప్రాతినిధ్యం వహిస్తున్నారు.
మేఘాలయ: ఇక్కడ ఎన్పీపీ భాజపాకు మిత్రపక్షమే. అయినప్పటికీ ముఖ్యమంత్రి కాన్రాడ్ సంగ్మా చట్టంలోని కొన్ని రిజర్వేషన్ల అంశమై ఆందోళన వ్యక్తం చేశారు. ఈ విషయమై ఆయన అమిత్ షాను కలిస్తే... రాష్ట్ర ప్రజల ప్రయోజనాలకు ఎలాంటి హానీ ఉండదని భరోసా కల్పించారు కేంద్ర హోం మంత్రి.
సిక్కిం: ఈ రాష్ట్రంలో సిక్కిం క్రాంతికారి మోర్చా.. భాజపా నేతృత్వంలోని ఈశాన్య ప్రజాస్వామ్య కూటమి పార్టీనే. అయితే.. పార్లమెంటులో పౌరచట్టానికి వ్యతిరేకంగా ఓటు వేసినప్పటికీ.. సిక్కిం అధికరణ 371(ఎఫ్) కింద ఉంది కాబట్టి.. కేంద్ర చట్టాన్ని తప్పనిసరిగా అమలు చేయాల్సిన పరిస్థితి నెలకొంది.
త్రిపుర: ఇక్కడ భాజపా మిత్రపక్షం ఐపీఎఫ్టీ కూడా చట్టానికి వ్యతిరేకమే.
మిజోరం: రాష్ట్రంలో భాజపా మిత్ర పక్షం- మిజో నేషనల్ ఫ్రంట్ క్యాబ్కు అనుకూలమే. అయితే.. కొత్త చట్టం నుంచి రాష్ట్రానికి మినహాయింపు కల్పించారు.
మణిపుర్: ఇక్కడ పెద్దగా ప్రాంతీయ పార్టీలేమీ లేవు. రాష్ట్రంలోని కాంగ్రెస్, వామపక్షాలు పౌర చట్టాన్ని వ్యతిరేకిస్తున్నాయి.
అరుణాచల్ ప్రదేశ్: ఇక్కడ అధికారంలో ఉంది భాజపానే. కొన్ని విద్యార్థి సంఘాలు, ఈశాన్య విద్యార్థి సమాఖ్యల నుంచి వ్యతిరేకత వ్యక్తమవుతోంది.
నాగాలాండ్: అధికార ఎన్డీపీపీ భాజపాకు మిత్రపక్షం. కొత్త పౌరచట్టానికి అనుకూలమే.
బంగాల్: ఇక్కడ మమతా బెనర్జీ నేతృత్వంలోని అధికార తృణమూల్ కాంగ్రెస్.. పౌరచట్టానికి పూర్తి వ్యతిరేకం. కేంద్ర నిర్ణయానికి వ్యతిరేకంగా రాష్ట్రంలో ఆందోళనలు హింసాత్మకంగా మారాయి. రాష్ట్ర ముఖ్యమంత్రే స్వయంగా నిరసనలను ముందుండి నడిపిస్తున్నారు.
బిహార్: బిహార్లోని అధికార జేడీయూ క్యాబ్కు మద్దతిస్తున్నప్పటికీ.. కేంద్రం దేశవ్యాప్తంగా తీసుకురావాలనుకుంటున్న ఎన్ఆర్సీని వ్యతిరేకిస్తోంది.
ఒడిశా: భాజపాకు మిత్ర పక్షం కానప్పటికీ ఇక్కడ అధికారంలోని బిజూ జనతాదళ్.. చట్టానికి మద్దతిస్తోంది.
ఝార్ఖండ్: ప్రతిపక్షంలో ఉన్న ఝార్ఖండ్ ముక్తి మోర్చా.. క్యాబ్ను పూర్తిగా వ్యతిరేకిస్తోంది.
ఆంధ్రప్రదేశ్: అధికార వైఎస్ఆర్ కాంగ్రెస్ పార్టీ వ్యతిరేకిస్తుండగా, ప్రతిపక్ష తెలుగుదేశం అనుకూలంగా ఓటేసింది.
తెలంగాణ: అధికార తెలంగాణ రాష్ట్ర సమితి.. చట్టానికి పూర్తిగా వ్యతిరేకం.
తమిళనాడు: రాష్ట్రంలో అధికారంలో ఉన్న ఏఐఏడీఎంకే పౌరసత్వ సవరణకు అనుకూలం. శ్రీలంకలో ఉన్న తమిళులకు ఈ చట్టం లాభిస్తోందన్న కారణంతో ఈ విధానానికి మొగ్గుచూపింది. అయితే యూపీఏ కూటమి పార్టీ డీఎంకే పౌరసత్వ చట్టానికి వ్యతిరేకం.
కర్ణాటక: మాజీ ప్రధాని దేవెగౌడ పార్టీ జేడీయూ చట్టానికి వ్యతిరేకం. లౌకకివాదానికి విఘాతం అన్న కారణంతో ప్రతికూలంగా ఉంది.
ఇదీ చూడండి: 'పౌరచట్టంపై కాంగ్రెస్ సభ్యులందరిదీ పోరాట పంథానే'
