కర్ణాటక రాజకీయ సంక్షోభం కొత్త మలుపులు తిరుగుతోంది. 10 మంది అసంతృప్త ఎమ్మెల్యేల రాజీనామాలపై ఈ రోజే నిర్ణయం తీసుకోవాలన్న సుప్రీంకోర్టు ఆదేశాలను వ్యతిరేకించారు సభాపతి రమేశ్ కుమార్. రాజీనామాలపై నిర్ణయం తీసుకునేందుకు మరికొంత గడువు కావాలని అత్యున్నత న్యాయస్థానంలో పిటిషన్ దాఖలు చేశారు స్పీకర్.
అయితే.. సభాపతి పిటిషన్ను అత్యవసరంగా విచారించాలని స్పీకర్ తరఫున న్యాయవాది కోర్టును కోరారు. ఈ వినతిని సుప్రీంకోర్టు తిరస్కరించింది. శుక్రవారం రోజు అసంతృప్త ఎమ్మెల్యేల పిటిషన్తో కలిపి విచారిస్తామని స్పష్టం చేసింది.
సుప్రీంకోర్టుకు ఆ హక్కు లేదు..
సుప్రీంకోర్టు తీర్పును తప్పుబట్టారు కర్ణాటక అసెంబ్లీ సభాపతి. ఎమ్మెల్యేల రాజీనామాలకు కారణం తెలుసుకోవాల్సి ఉందని.. విచారించేందుకు సమయం పడుతుందని పిటిషన్లో పేర్కొన్నారు. స్పీకర్ తరఫున అభిషేక్ మను సింఘ్వీ వాదనలు వినిపించారు.
"రాజ్యాంగబద్ధ పదవిలో ఉన్న స్పీకర్ ఆచితూచి నిర్ణయాలు తీసుకోవాల్సి ఉంటుంది. నిర్ణయం తీసుకోవడానికి మరికొంత సమయం పడుతుంది. రాత్రికి రాత్రే నిర్ణయం తీసుకోవాలని సుప్రీం ఆదేశించడం సరికాదు. ఇలాంటి నిర్ణయం తీసుకోవాలంటూ ఆదేశాలిచ్చే హక్కు సుప్రీంకోర్టుకు లేదు."
-అభిషేక్ మను సింఘ్వీ, స్పీకర్ తరఫు న్యాయవాది
ఎమ్మెల్యేల తీరును తప్పుబట్టిన సభాపతి
తనను కలవడానికి 10 మంది అంసతృప్త ఎమ్మెల్యేలు సుప్రీంకోర్టును ఆశ్రయించడాన్ని తీవ్రంగా తప్పుబట్టారు స్పీకర్ రమేశ్ కుమార్. శాసనసభ్యులు తనను కలవాలనుకుంటే అధికారిక కార్యాలయంలో అందుబాటులోనే ఉంటానని చెప్పారు.
నేనెందుకు రాజీనామా చేయాలి?: కుమార స్వామి
మరోవైపు ముఖ్యంత్రి పదవికి రాజీనామా చేసే ప్రసక్తే లేదని కుమార స్వామి తేల్చి చెప్పారు. తాను రాజీనామా చేయాల్సిన అవసరం లేదని, ఎందుకు రాజీనామా చేయాలని మీడియా ప్రతినిధులను ప్రశ్నించారు. 2009-10 సం.లో మంత్రులు సహా 18 మంది ఎమ్మెల్యేలు అప్పటి భాజపా ముఖ్యమంత్రి బీఎస్ యడ్యూరప్పను ముఖ్యమంత్రిగా వ్యతిరేకించినా ఆయన రాజీనామా చేయలేదని గుర్తు చేశారు కుమార స్వామి.
ఇదీ చూడండి: రైతులు ఘోషిస్తున్నారు.. పట్టించుకోండి: రాహుల్
