ఉత్తర్ప్రదేశ్ గోరఖ్పుర్లోని రైల్వే ఆసుపత్రిలో నిర్మించిన మరుగుదొడ్లపై సమాజ్వాదీ పార్టీ అభ్యంతరం వ్యక్తం చేసింది. టాయిలెట్లపై ఎరుపు, ఆకుపచ్చ టైల్స్ వాడటం.. అవే రంగుల్లో ఉండే తమ పార్టీ జెండాను కించపరిచే విధంగా ఉందని ఆరోపించింది.
ఈ విషయంపై నగరంలోని ఎస్పీ కార్యాలయంలో పార్టీ నేతలు గుమిగూడి నిరసన చేపట్టారు. ఇందుకు కారణమైనవారిపై చర్యలు తీసుకోవాలని డిమాండ్ చేశారు. వాటిపై నల్ల రంగు పూశారు.
"మా పార్టీ జెండాకు జరిగిన అవమానాన్ని మేం సహించం. రైల్వే విభాగం వాటిని మార్చాలి. దీని వెనుక ఎవరున్నారో జిల్లా పాలనా విభాగం గుర్తించాలి. వీటిని 3, 4 నెలల ముందే కట్టారు. కానీ, మా దృష్టికి ఇప్పుడే వచ్చింది. వెంటనే చర్యలు తీసుకోకపోతే రోడ్లపై నిరసన చేపడతాం. "
- రామ్ నగీనా, ఎస్పీ జిల్లా అధ్యక్షుడు
ఇదీ చూడండి: భూ చట్టాలకు వ్యతిరేకంగా పీడీపీ ఆందోళన- పలువురి అరెస్ట్
