ధూమపానం చేసేవారు కరోనా బారిన పడే అవకాశాలు అధికంగా ఉన్నట్లు ఓ నివేదిక వెల్లడించింది. దీని ద్వారా శ్వాసకోశ సంబంధిత సమస్యలు తీవ్రమవుతాయని హెచ్చరించింది.
'న్యూరోలాజికల్ ఇన్సైట్స్ ఆఫ్ కొవిడ్-19 పాండమిక్' పేరిట ఇండియన్ ఇన్స్టిట్యూట్ ఆఫ్ టెక్నాలజీ (ఐఐటీ) జోధ్పుర్కు చెందిన శాస్త్రవేత్తలు పరిశోధన చేశారు. ఈ నివేదిక అమెరికన్ కెమికల్ సొసైటీకి చెందిన అంతర్జాతీయ జర్నల్లో ప్రచురితమైంది.
రుచి, వాసన చూసే లక్షణాలపై ప్రభావం..
వైరస్ బారిన పడిన వారు రుచి, వాసన చూసే లక్షణాలను కోల్పోతారని హెచ్చరించింది నివేదిక. అలాంటి లక్షణాలు గుర్తిస్తే స్వీయ నిర్బంధంలోకి వెళ్లాలని.. ఇతరులకు సోకేందుకు కారకులు కాకముందే సంబంధిత నిపుణులను కలిసి చికిత్స తీసుకోవాలని సూచించింది. నిర్లక్ష్యం చేస్తే కేంద్ర నాడీ వ్యవస్థ, మెదడులోని అంతర్లీన నిర్మాణాలపై తీవ్ర ప్రభావం పడుతుందని వివరించింది.
" హెచ్ ఏసీఈ2 అనే ఎంజైమ్ ద్వారా వైరస్ శరీరంలోకి ప్రవేశిస్తుంది. ఇదే ప్రాథమిక ప్రవేశ మార్గం. ఊపిరితిత్తుల నుంచి నాసికా శ్లేష్మం వరకు ఈ ఎంజైమ్ ఉంటుంది. కరోనా రోగుల్లో నాడీవ్యవస్థ ఇన్ఫెక్షన్లు ధూమపానం వంటి వాటి ద్వారా తీవ్రమవుతాయి. మానవ గ్రాహకాలు (ఎంజైమ్), నికోటిన్ గ్రాహకాల మధ్య పరస్పర చర్యల వల్ల కొవిడ్-19 ఆధారిత న్యూరో ఇన్పెక్షన్లు సంక్రమించే అవకాశాలు పెరుగుతాయి. ఈ రెండు ఎంజైమ్ల మధ్య సంబంధం ఉండటం వల్ల ధూమపానం చేసినప్పుడు.. నికోటిన్ కారణంగా హెచ్ ఓసీఈ2 ఎంజైమ్ ఉత్తేజితమవుతుంది. "
-సురజిత్ ఘోష్, ఐఐటీ జోధ్పుర్ ప్రొఫెసర్
అదనపు కారకంగా..
కరోనా సోకిన రోగుల మెదడుపై పరీక్షలు, సెరెబ్రోస్ఫానయల్ ద్రవం విశ్లేషణ ఆధారంగా పొగతాగేవారు, తాగనివారిపై పరిశోధన చేసినట్లు వెల్లడించారు శాస్త్రవేత్తలు. కొవిడ్-19 రోగులలో వయస్సు, ఇప్పటికే ఉన్న అనారోగ్యాలతో పాటు ధూమపానం అదనపు ప్రమాద కారకంగా ఉంటోందని గుర్తించారు. కరోనా రోగులు వాసన, రుచి కోల్పోయేందుకు ముఖ్య కారణం ముక్కు, నోరు ఈ వైరస్కు ముఖ్యమైన ప్రవేశ మార్గాలుగా ఉండటమేనని తెలిపారు పరిశోధకులు. వైరస్ అక్కడి నుంచి నెమ్మదిగా మెదడులోని ఘ్రాణ బల్బ్లోకి నాడీ వ్యవస్థ ద్వారా చేరుతుందని చెప్పారు. ఈ ఘ్రాణ బల్బ్ అనేది వాసన చూసేందుకు ప్రధాన వ్యవస్థ అని వివరించారు.
ఇదీ చూడండి: కరోనా మృతుల్లో పురుషులే అధికం- ఎందుకు?
