Ullipaya Pachadi Recipe in Telugu : కొన్నిసార్లు ఇంట్లో కూరగాయలు ఏమీ ఉండవు. కేవలం ఉల్లిపాయలు మాత్రమే ఉంటుంటాయి. అలాంటి టైమ్లో ఏం కర్రీ చేసుకోవాలని ఆలోచించకుండా ఓసారి ఇలా "ఉల్లిపాయ పచ్చడి"ని ట్రై చేయండి. రుచి అదుర్స్ అనిపిస్తుంది. వేడివేడి అన్నంలో ఈ పచ్చడిని కాస్త నెయ్యి వేసుకొని తింటుంటే ఆ టేస్ట్ నెక్ట్ లెవల్! కేవలం అన్నంలోకే కాదు టిఫెన్స్లోకి అద్భుతంగా ఉంటుంది ఈ చట్నీ. మరి, ఈ సింపుల్ అండ్ టేస్టీ పచ్చడికి కావాల్సిన పదార్థాలేంటి? ఎలా ప్రిపేర్ చేసుకోవాలి? అనే వివరాలు ఇప్పుడు చూద్దాం.
కావాల్సిన పదార్థాలు :
- ఉల్లిపాయలు - 3 (మీడియం సైజ్వి)
- చింతపండు - చిన్న నిమ్మకాయ సైజంత
- నూనె - 2 టేబుల్స్పూన్లు
- మెంతులు - చిటికెడు
- శనగపప్పు - 1 టేబుల్స్పూన్
- మినప్పప్పు - 1 టేబుల్స్పూన్
- జీలకర్ర - అరటీ స్పూన్
- ఆవాలు - అరటీస్పూన్
- ఎండుమిర్చి - 9
- ఉప్పు - రుచికి సరిపడా
తాలింపు కోసం :
- నూనె - 2 టేబుల్స్పూన్లు
- ఆవాలు - పావుటీస్పూన్
- శనగపప్పు - 1 టీస్పూన్
- మినప్పప్పు - 1 టీస్పూన్
- జీలకర్ర - పావుటీస్పూన్
- ఎండుమిర్చి - 3
- కరివేపాకు - కొద్దిగా
- వెల్లుల్లి రెబ్బలు - 5
- ఇంగువ - చిటికెడు
- పసుపు - పావుటీస్పూన్
ఘుమఘుమల "టమాట పండుమిర్చి పచ్చడి" - ఇలా చేస్తే అమృతమే!
తయారీ విధానం :
- ఇందుకోసం ముందుగా ఉల్లిపాయలను పొట్టు తీసుకొని కాస్త పెద్ద సైజ్ ముక్కలుగా కట్ చేసుకొని పక్కన పెట్టుకోవాలి. అలాగే, ఒక చిన్న బౌల్లో చింతపండుని శుభ్రంగా కడిగి కాసేపు నానబెట్టుకోవాలి.
- ఇప్పుడు స్టౌపై పాన్ పెట్టుకొని ఆయిల్ వేసుకోవాలి. నూనె కాస్త వేడయ్యాక మెంతులు, శనగపప్పు, మినప్పప్పు, జీలకర్ర, ఆవాలు వేసుకొని కాసేపు వేయించుకోవాలి.
- అవి చక్కగా వేగాక మీ కారానికి తగినన్ని ఎండుమిర్చిని యాడ్ చేసుకొని మరికాసేపు ఫ్రై చేసుకోవాలి.
- ఎండుమిర్చి లైట్గా వేగిన తర్వాత అందులో ముందుగా కట్ చేసుకొని పెట్టుకున్న ఉల్లిపాయ ముక్కలు యాడ్ చేసుకోవాలి. ఆ తర్వాత మీడియం ఫ్లేమ్ మీద గరిటెతో కలుపుతూ ఆనియన్స్ రంగు మారి, కాస్త మెత్తబడే వరకు వేయించుకోవాలి.
- ఆ విధంగా వేయించుకున్నాక స్టౌ ఆఫ్ చేసుకొని ఆ మిశ్రమాన్ని మిక్సీ జార్లోకి తీసుకోవాలి. ఆపై అందులోనే నానబెట్టుకున్న చింతపండుని వాటర్తో సహా వేసుకోవాలి. అలాగే, ఉప్పు వేసుకొని మరీ మెత్తగా కాకుండా కాస్త బరకగా ఉండేలా గ్రైండ్ చేసుకొని పక్కనుంచాలి.
- ఇప్పుడు తాలింపుని ప్రిపేర్ చేసుకోవాలి. ఇందుకోసం స్టౌపై పాన్ పెట్టుకొని ఆయిల్ వేసుకోవాలి. నూనె వేడయ్యాక శనగపప్పు, మినప్పప్పు, జీలకర్ర, ఆవాలు వేసుకొని అవి చిటపటమనే వరకు వేయించుకోవాలి.
- అవి వేగాక కచ్చాపచ్చాగా దంచిన వెల్లుల్లి రెబ్బలు, ఎండుమిర్చి తుంపలు, కరివేపాకు, ఇంగువ వేసి పోపుని లో ఫ్లేమ్ మీద చక్కగా వేగనివ్వాలి.
- చివర్లో పసుపు వేసి కలిపి ముందుగా గ్రైండ్ చేసుకున్న పచ్చడిని వేసి మొత్తం కలిసేలా ఒకసారి బాగా మిక్స్ చేసుకోవాలి. ఆపై సన్నని సెగ కాసేపు మగ్గించుకొని దింపేసుకుంటే చాలు. అంతే, నోరూరించే కమ్మని "ఉల్లిపాయ పచ్చడి" రెడీ!
- ఇది బయట ఉంచితే కనీసం రెండు మూడు రోజులు నిల్వ ఉంటుంది. అదే ఫ్రిజ్లో స్టోర్ చేస్తే వారం పాటు ఫ్రెష్గా ఉంటుంది!
