'పార్లమెంటులో మహిళా ఎంపీలపై సిబ్బంది దౌర్జన్యం'

లోక్​సభలో వెల్​లోకి వెళ్లిన మహిళా పార్లమెంటు సభ్యులపై భద్రతా సిబ్బంది దౌర్జన్యం చేశారని కాంగ్రెస్ పార్టీ ఆరోపించింది. ఉభయ సభల్లో కాంగ్రెస్ అసభ్యంగా ప్రవర్తించిందని కేంద్ర మంత్రి రవిశంకర్ ప్రసాద్ ఆగ్రహం వ్యక్తం చేశారు.

లోక్​సభలో మహిళా పార్లమెంటు సభ్యులపై భద్రతా సిబ్బంది దౌర్జన్యం చేశారని కాంగ్రెస్ నేత అధీర్ రంజన్ చౌదరి ఆరోపించారు. మహారాష్ట్రలో ప్రభుత్వ ఏర్పాటున వ్యతిరేకిస్తూ వెల్​లోకి వెళ్లినప్పుడు ఈ సంఘటన జరిగిందని తెలిపారు.

"మహిళా ఎంపీలపై భద్రతా సిబ్బంది దౌర్జన్యం చేశారు. పార్లమెంటులో ఇలాంటి ఘటన ఎప్పుడూ జరగలేదు. ఇందుకు కారణమైనవారిపై ఎలాంటి చర్యలు తీసుకుంటారో చూస్తాం."

-అధీర్ రంజన్ చౌదురి, కాంగ్రెస్ నేత

అయితే సభలో కాంగ్రెస్ నిరసనలపై భాజపా తీవ్రస్థాయిలో విరుచుకుపడింది. కాంగ్రెస్ సభ్యులు అసభ్యకరంగా ప్రవర్తించారని కేంద్ర న్యాయశాఖ మంత్రి రవిశంకర్ ప్రసాద్​ ఆగ్రహం వ్యక్తం చేశారు.

"అన్ని పార్టీలు కలిసి సభ మర్యాద, సంస్కృతిని కాపాడాల్సి ఉంది. కానీ ఈరోజు రెండు సభల్లో జరిగిన దానిని ఖండిస్తున్నాం. కాంగ్రెస్​కు చెందిన ఇద్దరు నేతలు చేసిన చర్యలకు ఆ పార్టీ మద్దతు ఇవ్వటం దురదృష్టకరం. మహారాష్ట్ర ఎన్నికల్లో భాజపా-శివసేనకు మెజారిటీ వచ్చింది. కానీ 30 ఏళ్ల స్నేహాన్ని స్వార్థం, అవకాశవాదం కోసం వదిలేసింది. అలాంటి శివసేనను అక్కున చేర్చుకుంది కాంగ్రెస్. ప్రజాస్వామ్యాన్ని ఖూనీ చేసేది ఎవరు? కాంగ్రెస్ మాత్రమే."

-రవిశంకర్ ప్రసాద్​, కేంద్ర న్యాయశాఖ మంత్రి

ఇదీ చూడండి: 'ఆపరేషన్​ మహా'తో ప్రజాస్వామ్యం ఖూనీ: రాహుల్