నేడు ప్రపంచం మొత్తం కరోనా వైరస్‌తో యుద్ధం చేస్తోంది. ఆ శత్రువు మన కంటికి కనిపించదు. దాని వల్ల కలుగుతున్న నష్టాలు మాత్రం మనకు ప్రబలంగా కనిపిస్తున్నాయి. అంతిమంగా మన జీవన విధానానికే ముప్పు ఏర్పడుతోంది. ఈ మహమ్మారి వ్యాప్తిని అడ్డుకోవడానికి దేశాలు నిర్బంధలను అమలు చేస్తున్నాయి. దీనివల్ల వైరస్ వ్యాప్తి నెమ్మదిస్తుంది కానీ పూర్తిగా అడ్డుకట్ట పడదు. పైగా ఈ ఆంక్షలు కఠినంగా ఉండాలి.
చైనాలో వీటిని కట్టుదిట్టంగా అమలు చేసి, విజయం సాధించారు. ప్రజాస్వామ్య దేశాల్లో ఇంత గట్టిగా అమలుకావడం అసాధ్యం. అమెరికాలోని హార్వర్డ్‌ విశ్వవిద్యాలయ అధ్యయనం ప్రకారం ఈ మహమ్మారి ఉద్ధృతి మరింత పెరిగితే.. వచ్చే 6-12 నెలల్లో జనాభాలో 40 శాతం మందికి సోకొచ్చు. అలాంటప్పుడు ఆసుపత్రుల్లో పడకల సామర్థ్యం రెట్టింపు కావాలి. ఐసీయూల సామర్థ్యం మూడింతలు పెరగాలి. సంరక్షకులు, వైద్య ఉపకరణాలు భారీగా అవసరం. వీటికి ఇప్పటి నుంచే సన్నద్ధం కావాలి. ఇందుకు 'స్టాన్‌ఫర్డ్‌' పరిశోధకులు చేస్తున్న సూచనలివీ..
సామర్థ్యం పెంపు
ఖాళీగా ఉన్న భవనాలను తాత్కాలిక క్వారంటైన్లుగా, ఆసుపత్రులుగా మార్చాలి. ఆరోగ్యం విషమంగా లేని రోగులను అక్కడ ఉంచొచ్చు. లేదా సాంక్రమికేతర రుగ్మతలు కలిగిన వారిని ఇక్కడ పెట్టి, ప్రస్తుత ఆసుపత్రులపై భారాన్ని తగ్గించుకోవచ్చు.
సంరక్షకులకు శిక్షణ
ఆరోగ్యంగా ఉన్న వైద్య విద్యార్థులు, సిబ్బంది, బోధన సిబ్బంది, సామాజిక వలంటీర్లను ఎంపిక చేసుకోవాలి. వారి వయసు కూడా తక్కువగా ఉండాలి. కరోనా సోకి విడిగా ఉంటున్నవారికి సేవలు అందించేలా వీరికి శిక్షణ ఇవ్వాలి. మౌలిక వసతులూ కల్పించాలి.
వెంటిలేటర్ల రూపకల్పన
ఇంజినీరింగ్‌ కళాశాలలు, డిజైన్‌ సంస్థలకు బాధ్యతలు అప్పగించి, వేగంగా వెంటిలేటర్ల రూపకల్పనకు చర్యలు చేపట్టాలి. వాటికి అత్యున్నత ప్రమాణాలు అవసరం లేదు. 12 నెలలు పనిచేసేలా రూపొందిస్తే చాలు. వెంటిలేటర్ల కొరతతో ఎవరూ చనిపోయే పరిస్థితి రాకూడదు.
పరీక్షా సాధనాలపై పెట్టుబడి
చౌకలో, వేగంగా కరోనా నిర్ధారణ పరీక్షలు చేసేందుకు వైద్య కళాశాలలు, నిపుణులు, వ్యాపార సంస్థల భాగస్వామ్యంతో కొత్త విధానాలను రూపొందించాలి. రేషన్‌ పద్ధతిలో పరీక్షలు నిర్వహించే పరిస్థితి ఉండకూడదు. పరీక్షలు అందుబాటులో లేకుంటే.. రోజులో అనేకసార్లు శరీర ఉష్ణోగ్రతను సొంతంగా పరీక్షించుకునేలా ప్రజలను ప్రోత్సహించాలి.
నెట్‌వర్క్‌ నిర్వహణ
కరోనా ఉన్నట్లు తేలిన సందర్భంలో సదరు రోగికి సన్నిహితంగా వచ్చిన వారందరినీ వెంటనే గుర్తించి, అప్రమత్తం చేసేందుకు విద్యార్థుల సాయంతో ఒక యాప్‌ను అభివృద్ధి చేయాలి. దీనిద్వారా ఆసుపత్రులనూ అప్రమత్తం చేయవచ్చు. క్వారంటైన్‌ నిబంధనలను అనుసరించినవారికి ప్రోత్సాహకాలు ఇవ్వవచ్చు.
గట్టి చర్యలు అవసరం
కరోనాను ఎదుర్కొనేందుకు నిర్బంధం ఒక్కటే సరిపోదని ప్రపంచ ఆరోగ్య సంస్థ (డబ్ల్యూహెచ్‌వో) నిపుణుడు మైక్‌ ర్యాన్‌ పేర్కొన్నారు. ఈ వైరస్ సోకినవారిని ఎప్పటికప్పుడు గుర్తించి, వేరు చేయాలన్నారు. ‘‘పటిష్ఠ ప్రజారోగ్య చర్యలను చేపట్టకుంటే.. నిర్బంధం ఎత్తివేశాక కరోనా మళ్లీ ఉద్ధృతమవుతుంది’’ అని హెచ్చరించారు.
- డబ్ల్యూహెచ్‌వో నిపుణుడు
ఇప్పటి వరకు ప్రపంచవ్యాప్తంగా ఈ మహామ్మారి వల్ల దాదాపు 16 వేల మంది మరణించారు.
ఇదీ చూడండి : దేశవ్యాప్తంగా 548 జిల్లాలు పూర్తిగా లాక్డౌన్
