ఉత్తర బంగాల్ జల్పాయిగురి జిల్లాకు చెందిన ఓ లబ్ధిదారుడు పీఎం ఉజ్వల యోజన(పీఎంయూవై) పథకం కింద వంట గ్యాస్ను బుక్ చేసుకున్నాడు. సిలిండర్ రాగానే ఇక చకచకా వంట చేసుకోవచ్చు అనుకున్న ఆ వ్యక్తి గ్యాస్ స్థానంలో ఇసుక చూసి ఆశ్చర్యానికి గురయ్యాడు.
అసలేం జరిగిందంటే!
జల్పాయిగురి జిల్లాలోని కాయెట్గోచ్ గ్రామానికి చెందిన రమేశ్ రాయ్ 12 రోజుల క్రితం పీఎంయూవై పథకం కింద ఎల్పీజీ సిలిండర్ను పొందాడు. అయితే శుక్రవారం నుంచి గ్యాస్ వెలగడం లేదు. పైగా సిలిండర్ బరువుగా ఉండడం వల్ల ఏం అయిందో అర్థంకాక కంగారు పడ్డాడు రమేశ్. ఎన్ని సార్లు ప్రయత్నించినా స్టవ్ వెలగకపోవడం వల్ల పొరుగింటి వారిని పిలిచారు. అనుమానంతో చూసే సరికి అందులో ఇసుక ఉన్నట్లు గమనించి షాక్కు గురయ్యాడు.
" సిలిండర్ నిండుగా, బరువుగా ఉంది. పైగా నేను గ్యాస్ సిలిండర్ పొంది 12 రోజులే అవుతోంది. అనుమానం వచ్చి బరువు చూడగా 21 కేజీలు ఉంది. అయినా స్టవ్ వెలగలేదు. చివరిగా సిలిండర్ మూత తీసి వంచగా అందులో నుంచి సుమారు 6 కేజీల ఇసుక బయటకు వచ్చింది. అందరం షాక్కు గురయ్యాం. వెంటనే పంపిణీదారుడికి సమాచారం ఇచ్చా."
-- రమేశ్ రాయ్
మాకు సంబంధం లేదు
సిలిండర్లోకి ఇసుక ఎలా వచ్చిందో తమకు తెలియదన్నారు పంపిణీదారుడు. ఈ విషయమై దర్యాప్తు చేస్తామని తెలిపాడు. ఎల్పీజీ సిలిండర్లను ఇంటింటికీ అందించడమే తమ పని అని చెప్పుకొచ్చాడు.
ఇదీ చదవండి: నిండు చూలాలు.. వందల కిలోమీటర్ల నడక ప్రయాణం
