రోడ్డు ప్రమాదాల నివారణ, సురక్షితమైన ప్రయాణమే లక్ష్యంగా తీసుకొచ్చిన నూతన మోటారు వాహన చట్టం (సవరణ)-2019 అమలు తర్వాత వాహనదారుల జేబులకు భారీ స్థాయిలో చిల్లు పడింది. సుమారు రూ.577.5 కోట్ల విలువైన 38 లక్షల చలాన్లు జారీ అయినట్లు కేంద్ర రోడ్డు రవాణా శాఖ మంత్రి నితిన్ గడ్కరీ వెల్లడించారు. కోర్టులకు సిఫార్సు చేసిన చలాన్ల డేటా మాత్రమే అందుబాటులో ఉందని.. ఇప్పటి దాకా వచ్చిన ఆదాయమెంతో తెలియదని లోక్సభ వేదికగా తెలిపారు.
"ఎన్ఐసీలో అందుబాటులో ఉన్న సమాచారం మేరకు 18 రాష్ట్రాలు, కేంద్ర పాలిత ప్రాంతాల్లో 38,39,406 చలాన్లు జారీ అయ్యాయి. వీటి విలువ రూ.5,77,51,79,895గా ఉంది"
- నితిన్ గడ్కరీ.
తొలిస్థానంలో తమిళనాడు..
చలాన్ల జారీలో.. 14,13,996తో తమిళనాడు మొదటి స్థానంలో నిలిచింది. కేవలం 58 చలాన్లతో గోవా చివరి స్థానంలో ఉంది.
సెప్టెంబర్ 1 నుంచి...
కఠిన నిబంధనలు, భారీ స్థాయిలో జరిమానాలను విధించేందుకు తీసుకొచ్చిన మోటారు వాహనాల చట్ట సవరణ-2019 ఈ ఏడాది సెప్టెంబర్1 నుంచి అమల్లోకి వచ్చింది. కొన్ని రాష్ట్రాలు ఇప్పటికే జరిమానాల విలువను తగ్గించాయి. ఈ చట్టాన్ని అమలు చేయని రాష్ట్రాల సమాచారం తమ వద్ద లేదని కేంద్ర ప్రభుత్వం ఇటీవలే ప్రకటించింది.
ఇదీ చూడండి: కేంద్రప్రభుత్వంలో 7 లక్షల ఉద్యోగాలు ఇచ్చేందుకు అవకాశం
