బిహార్ శాసనసభ ఎన్నికల ఫలితాల్లో అధికార ఎన్డీఏ విజయఢంకా మోగించింది. ఎన్డీఏలోని భాజపా గతంలో కంటే ఎక్కువ స్థానాలను గెలుపొందింది. బిహార్లో మొట్టమొదటి సారి రెండో అతిపెద్ద పార్టీగా భాజపా అవతరించింది. ఎన్డీఏ భాగస్వామ్య పార్టీ జేడీయూకి మాత్రం కొన్ని చోట్ల ఎదురు దెబ్బ తగిలింది. అయితే ఎగ్జిట్ పోల్స్ మరోసారి ప్రజానాడిని పట్టుకోవడంలో విఫలమయ్యాయి. అసలు ఎన్డీఏ విజయానికి కారణాలేంటి?
సుపరిపాలన, అభివృద్ధి...
బిహార్లో నితీశ్ మార్క్ సుపరిపాలన, అభివృద్ధి పథకాల కొనసాగింపే లక్ష్యంగా ఎన్డీఏ ఎన్నికల బరిలో నిలిచింది. వచ్చే ఐదేళ్లలో రాష్ట్రంలో చేపట్టబోయే పలు అభివృద్ధి కార్యక్రమాలను ముఖ్యమంత్రి నితీశ్ కుమార్ ఎన్నికల ప్రణాళికలో వివరించారు.
మహిళా సాధికారత కోసం రూ.5 లక్షల వరకు వడ్డీ లేని రుణాలు ఇస్తామని నితీశ్ హామీ ఇచ్చారు. ఉపాధి హామీ పథకం కింద పనిదినాలను 100 నుంచి 200 రోజులకు పెంచుతామని వాగ్దానం చేశారు. ఇవన్నీ ఎన్డీఏ విజయానికి కారణమయ్యాయి.
మోదీయే బలం...
ఈ ఎన్నికల్లో నితీశ్ కుమార్ నేతృత్వంలోనే బరిలోకి దిగింది ఎన్డీఏ. కానీ ఫలితాలు చూస్తే నితీశ్ పాలన కన్నా మోదీ చరిష్మాయే బాగా పనిచేసినట్లు తెలుస్తోంది. జేడీయూ కన్నా భాజపా అధిక స్థానాల్లో గెలుపొందడమే ఇందుకు నిదర్శనం.
మోదీ సహా అగ్రనేతల ప్రచారం...
ఎన్డీఏ తరఫున మోదీ రెండు భారీ బహిరంగ సభల్లో ప్రసంగించారు. ముఖ్యంగా ఆర్జేడీపై మోదీ చేసిన అవినీతి ఆరోపణలు ప్రజల్లోకి బలంగా వెళ్లాయి. మోదీతో పాటు ఎన్డీఏ అగ్రనాయకులు ఎన్నికలకు చాలా రోజుల ముందే ప్రచారాన్ని మొదలుపెట్టడం కలిసివచ్చింది.
ప్రత్యర్థి ఓటు బ్యాంక్పై...
బిహార్ రాజకీయాల్లో దళితులు(డీ), ముస్లింలు(ఎం), యాదవులు(వై) ఎంతో కీలకం. రాష్ట్రంలో దాదాపు 50 శాతం ఓట్లు వారివే. ఏ కూటమి అధికారం చేపడుతుందో నిర్ణయించడంలో ఈ మూడు వర్గాలే కీలకం. ఈ వర్గాలపై గురిపెట్టడం ఎన్డీఏకు కలిసివచ్చింది.
ముఖ్యంగా ప్రత్యర్థి ఓటు బ్యాంక్లైన ముస్లిం, యాదవులపై ప్రత్యేక దృష్టి పెట్టారు నితీశ్. ఎన్నికలకు ముందు జేడీయూలోకి చేరిన ఆర్జేడీ ఎమ్మెల్యేల్లో అత్యధికులు యాదవులే. వీరి ఓట్లు రాబట్టుకోవడంలో నితీశ్ కీలకంగా వ్యవహరించారు.
ఉచిత వ్యాక్సిన్ ప్రకటన...
ఈ ఎన్నికల్లో ఎన్డీఏ ఇచ్చిన ఉచిత వ్యాక్సిన్ హామీ విపక్షాల విమర్శలకు కారణమైంది. అయితే ప్రజలు దీనిపై సానుకూలతనే చూపినట్లు తెలుస్తోంది. ప్రస్తుతం కరోనా కాలంలో ఈ వాగ్దానం ఎన్డీఏకు కలిసివచ్చినట్టే కనిపిస్తోంది.
లిక్కర్ అస్త్రం...
బిహార్లో సంపూర్ణ మద్యపాన నిషేధం విధించడం మహిళా ఓటర్లను ఆకర్షించింది. మహిళా ఓటు బ్యాంకుపై నితీశ్ గురిపెట్టిన అస్త్రం మంచి ఫలితాలనే ఇచ్చింది.
యువత.....
మహాకూటమి ప్రకటించిన 10 లక్షల ఉద్యోగాల కల్పనపై తొలుత ఎన్డీఏ కంగారు పడినట్లు కనిపించినా వెంటనే తేరుకొని 19 లక్షల ఉద్యోగాలిస్తామని హామీ ఇచ్చింది. యువ ఓటర్లు చేజారిపోకుండా ఉండేందుకు ఈ మంత్రం ఫలించింది.
ఐటీ హబ్...
ఆర్థికంగా వెనుకబడిన రాష్ట్రానికి ఐటీ హబ్, ఐటీ ఇన్ఫ్రా అభివృద్ధి ప్రకటనలు కలిసివచ్చాయి.
మధ్యతరగతి...
గ్రామాలు, పట్టణాల్లో 30 లక్షల మందికి గృహకల్పన వాగ్దానం మధ్యతరగతి ఓట్లను రాబట్టింది.
లక్ష మంది మహిళలకు మైక్రో ఫైనాన్సింగ్ సదుపాయం ఇస్తామనడం కలిసివచ్చింది.
