రాజస్థాన్ రాజకీయాలు రోజురోజుకు ఉత్కంఠగా మారుతున్నాయి. తాజాగా.. ముఖ్యమంత్రి అశోక్ గహ్లోత్ నివాసంలో అర్థరాత్రి వరకు కేబినెట్ సమావేశం జరిగింది. శాసనసభ నిర్వహణపై గవర్నర్ కల్రాజ్ మిశ్రా అడిగిన ఆరు ప్రశ్నలపై ఈ భేటీలో మంత్రులు సుదీర్ఘంగా చర్చినట్టు సమాచారం.
రాష్ట్రంలో రాజకీయ సంక్షోభం ముదురుతున్న నేపథ్యంలో బలనిరూపణ కోసం శాసనసభ సమావేశాలకు పిలుపునివ్వాలని శుక్రవారం గవర్నర్ను కోరారు గహ్లోత్. ఈ విషయంలో రాజ్యంగబద్ధంగానే ముందుకు వెళతానని స్పష్టం చేశారు మిశ్రా. అయితే అసలు సమావేశాలను ఎందుకు నిర్వహించాలి? అనే విషయంపై పలు ప్రశ్నలు సంధిస్తూ ప్రభుత్వానికి లేఖ రాశారు గవర్నర్. దీనిపై రెండున్నర గంటలపాటు చర్చించిన మంత్రులు.. తమ సమాధానాన్ని శనివారం గవర్నర్కు అందించనున్నట్టు సమాచారం.
గతకొంత కాలంగా కాంగ్రెస్పై అసంతృప్తిగా ఉన్న సచిన్ పైలట్ పార్టీపై తిరుగుబావుటా ఎగరవేశారు. అనంతరం పైలట్పై వేటు వేసింది కాంగ్రెస్. డిప్యూటీ సీఎం, పీసీసీ చీఫ్ పదవుల నుంచి తప్పించింది. ఈ నేపథ్యంలో ప్రభుత్వంలో అనిశ్చితి నెలకొంది. అయితే తమ వద్ద మెజారిటీకి సరిపడా బలం ఉందని గహ్లోత్ వర్గం ధీమా వ్యక్తం చేస్తోంది.
ఇవీ చూడండి:-
