ప్లాస్టిక్పై యుద్ధానికి రైల్వే శాఖ కసరత్తు ముమ్మరం చేసింది. మెట్రో, పెద్ద నగరాల్లోని 407 స్టేషన్లలో వాటర్ బాటిల్ క్రషర్లు (బాటిళ్లను చిన్న చిన్న ముక్కలుగా చేసే యంత్రాలు)ను ఏర్పాటు చేయాలని లక్ష్యంగా నిర్దేశించుకుంది. 2019 అక్టోబర్ 2లోపు అన్ని ఏ1, ఏ కేటగిరీ స్టేషన్లలో పూర్తి స్థాయిలో క్రషర్లను అందుబాటులోకి తీసుకురావాలని చర్యలు చేపట్టింది.
స్వచ్ఛతా-హీ-సేవా...
సెప్టెంబర్ 11 నుంచి అక్టోబర్ 2 గాంధీ జయంతి వరకు 'స్వచ్ఛతా హీ సేవా(ఎస్హెచ్ఎస్)' కార్యక్రమం చేపట్టనున్నట్లు రైల్వే మంత్రిత్వ శాఖ ఓ ప్రకటనలో తెలిపింది. బుధవారం ఎస్హెచ్ఎస్ తొలి రోజు సందర్భంగా పెద్దఎత్తున సిబ్బందితో ప్లాస్టిక్ వ్యర్థాల సేకరణ కార్యక్రమం 'శ్రమదాన్' చేపట్టింది.
ప్రచారం...
'ఒక్కసారి మాత్రమే వినియోగించే ప్లాస్టిక్ నిషేధం' పై విస్తృత ప్రచారం సహా ప్లాస్టిక్ వ్యర్థాల నిర్వహణపై రైల్వేశాఖ చర్యలు చేపట్టనుంది. ముఖ్యమైన ప్రాంతాల్లో బ్యానర్లు, పోస్టర్లు వంటివి ఏర్పాటు చేయనుంది. అన్ని ఏ1, ఏ కేటగిరి రైల్వే స్టేషన్లలో ఎస్హెచ్ఎస్ లోగోతో ఉన్న ప్రత్యేక వ్యర్థాల సేకరణ డబ్బాలను పెంచనున్నారు. దేశవ్యాప్తంగా రైల్వేశాఖ ఆధ్వర్యంలో చేపడుతున్న 150 నర్సరీల అభివృద్ధికి సంబంధించిన పనులు అక్టోబర్ 2 నాటికి పూర్తికానున్నాయి.
