హెలికాప్టర్​కు 'నో'- రాహుల్​ ర్యాలీ రద్దు

హెలికాప్టర్​ లాండింగ్​కు అనుమతించకపోవడం వల్ల పశ్చిమ్​ ​బంగాలో రాహుల్​ గాంధీ ర్యాలీ రద్దయింది. అయితే రాహుల్​ ర్యాలీపై తనకు ఎలాంటి సమాచారం లేదని పార్టీ రాష్ట్ర అధ్యక్షుడు అనటం చర్చనీయాంశమైంది.

సార్వత్రిక ఎన్నికల నేపథ్యంలో పశ్చిమ్​ బంగాలోని సిలిగుడిలో జరగాల్సిన కాంగ్రెస్​ అధ్యక్షుడు రాహుల్​ గాంధీ ర్యాలీ రద్దయింది. ఆ ప్రాంతంలో రాహుల్​ హెలికాప్టర్​ లాండింగ్​కు అనుమతి లభించకపోవడమే దీనికి కారణం. ఈ విషయాన్ని పార్టీ సీనియర్​ నేత శంకర్​ మలకర్​ వెల్లడించారు.

"సిలిగుడి పోలీసు గ్రౌండ్స్​లో ఈనెల 14న రాహుల్​ గాంధీ హెలికాప్టర్​ లాండింగ్​ కోసం పోలీసులను సంప్రదించాము. కానీ వారు అంగీకరించలేదు. అందుకే ర్యాలీని రద్దు చేసుకున్నాము."
--- శంకర్​ మలకర్​, కాంగ్రెస్​ నేత.

ఈ విషయంపై స్పందించిన సిలిగుడి పోలీసు కమిషనర్​... కొన్ని నింబంధనల వల్లే అనుమతులు నిరాకరించినట్టు స్పష్టం చేశారు.

ర్యాలీపై గందరగోళం...

రాహుల్​ ర్యాలీ రద్దుపై బంగాల్​ కాంగ్రెస్​ శ్రేణుల నుంచి మిశ్రమ స్పందనలు వ్యక్తమయ్యాయి. రాహుల్​ ర్యాలీ రద్దు చేసినట్టు సీనియర్​ నేత మలకర్​ ప్రకటిస్తే... అసలు కాంగ్రెస్​ అధ్యక్షుడి ర్యాలీ ఉన్నట్టే తనకు తెలియదని ఆ​ పార్టీ రాష్ట్ర అధ్యక్షుడు సోమెన్​ మిత్రా తెలిపారు.

మిత్రాకు సమాచారం ఇవ్వకుండానే పోలీసులను మలకర్ సంప్రదించారని పార్టీ వర్గాల సమాచారం. పార్టీ రాష్ట్ర అధ్యక్షుడికి చెప్పకుండా ర్యాలీలు ఏర్పాటు చేయడమేంటని పలువురు సీనియర్​ నేతలు మండిపడుతున్నారు.