'గళం విప్పితే కోర్టు కేసులతో వేధింపులు'

దేశంలో ఆర్​ఎస్​ఎస్ సిద్ధాంతాలకు, ప్రధానమంత్రి నరేంద్రమోదీకి వ్యతిరేకంగా గళం విప్పిన వారు కోర్టు కేసులు ఎదుర్కోవాల్సిన పరిస్థితులు నెలకొన్నాయన్నారు కాంగ్రెస్ నేత రాహుల్ గాంధీ. బిహార్ ఉపముఖ్యమంత్రి సుశీల్​కుమార్​ మోదీ వేసిన పరువునష్టం కేసు విచారణ సందర్భంగా పట్నా కోర్టులో హాజరయ్యారు రాహుల్. ఆయనకు కోర్టు బెయిల్ మంజూరు చేసింది.

ప్రధానమంత్రి నరేంద్రమోదీ, భాజపా, ఆర్​ఎస్​ఎస్​పై తీవ్ర స్థాయిలో విమర్శలు చేశారు కాంగ్రెస్ నేత రాహుల్ గాంధీ. ఆర్​ఎస్​ఎస్ సిద్ధాంతాలకు వ్యతిరేకంగా మాట్లాడితే కోర్టు కేసులు ఎదుర్కోవాల్సిన పరిస్థితులు దేశంలో నెలకొని ఉన్నాయన్నారు.

బిహార్ ఉపముఖ్యమంత్రి సుశీల్ కుమార్ మోదీ దాఖలు చేసిన పరువు నష్టం కేసు విచారణ సందర్భంగా పట్నా కోర్టుకు హాజరయ్యారు రాహుల్. ఈ కేసులో ఆయనకు ఊరట లభించింది. రాహుల్​కు కోర్టు బెయిల్ మంజూరు చేసింది.

"ఆర్​ఎస్ఎస్ సిద్ధాంతాలకు, మోదీ భావజాలానికి వ్యతిరేకంగా నిల్చున్నవారు దాడి, కోర్టు కేసులు ఎదుర్కోవాల్సి ఉంటుంది. రాజ్యాంగాన్ని రక్షించేందుకు, పేద ప్రజల పక్షాన గళం విప్పేందుకు, రైతులకు బాసటగా నిలిచేందుకే పోరాటం చేస్తున్నాను. ఈ కారణంగానే నేను ఇక్కడికి వచ్చాను. కొంతమంది వ్యక్తులను రక్షించేందుకు దేశం కోసం పోరాడే వారిక గొంతు నొక్కుతున్నారు. నా పోరాటం కొనసాగిస్తాను."

-రాహుల్ గాంధీ, కాంగ్రెస్ నేత

కోర్టు వద్ద నిరసనలు...

పట్నా న్యాయస్థానం వద్ద కాంగ్రెస్ కార్యకర్తలు ధర్నా చేశారు. పార్టీ అధ్యక్ష పదవికి రాహుల్​ రాజీనామా వెనక్కి తీసుకోవాలని డిమాండ్ చేశారు.

వరుసగా న్యాయస్థానాలకు హాజరు...

ఆర్​ఎస్​ఎస్​కు చెందిన ఓ కార్యకర్త దాఖలు చేసిన పరువునష్టం కేసుపై శుక్రవారం ముంబయి కోర్టుకు హాజరయ్యారు రాహుల్. శనివారం పట్నా కోర్టుకు హాజరయ్యారు. ఈ కేసు తదుపరి విచారణ ఆగస్టు 8న జరగనుంది.

ఇదీ చూడండి: పరువు నష్టం కేసులతో రాహుల్​ బిజీబిజీ