'మోదీ జీ.. చైనా విషయంలో మౌనమేల?'

ప్రధాని నరేంద్ర మోదీపై కాంగ్రెస్​ నేత రాహుల్ గాంధీ విమర్శలు గుప్పించారు. చైనా బలగాలు ఆక్రమిస్తుండటంపై మోదీని ఎద్దేవా చేశారు. తమిళనాడు ఎన్నికల ప్రచారం సందర్భంగా ఆదివారం ఈ వ్యాఖ్యలు చేశారు.

ప్రధానమంత్రి నరేంద్ర మోదీ లక్ష్యంగా మరోమారు విమర్శనాస్త్రాలు ఎక్కుపెట్టారు కాంగ్రెస్ అగ్ర నేత రాహుల్ గాంధీ. భారత్​ను చైనా బలగాలు ఆక్రమిస్తుంటే 56 అంగుళాల ఛాతి గల వ్యక్తి కనీసం డ్రాగన్ పేరును కూడా ప్రస్తావించలేకపోతున్నారని ఎద్దేవా చేశారు. రైతులు, కార్మికులు, చేనేత కార్మికులతోనే భారత్​ బలపడుతుందని అన్నారు.

ఈ మూడు వర్గాలకు బలం చేకూరిస్తే చైనాతో ఉన్న దేశ సరిహద్దులను జవాన్లు కాపలా ఉండాల్సిన అవసరం లేదని అభిప్రాయపడ్డారు. తమిళనాడులోని త్రిపుర, ఈరోడ్​లలో ఆదివారం నిర్వహించిన ప్రచార కార్యక్రమాల్లో ఈ వ్యాఖ్యలు చేశారు రాహుల్​. తొలిసారిగా.. భారత భూభాగాన్ని చైనా ఆక్రమించుకోవడం దేశ ప్రజలు గమనిస్తున్నారని తెలిపారు.

"తమిళ సంస్కృతిని నేను స్వాగతించడమే కాదు గౌరవిస్తాను కూడా. ప్రధాని, భాజపాలు తమిళులను కించపరిస్తే చూస్తూ ఊరుకోను. భిన్న సంస్కృతులు ఉండటం భారత్​కు బలం. దేశంలోని ప్రతి భాషను, సంస్కృతిని, మతాన్ని కాపాడుకోవడం మన బాధ్యత."

-రాహుల్ గాంధీ, కాంగ్రెస్ నేత

మోదీ దేశంలోని ఐదు లేదా ఆరుగురు వ్యాపారవేత్తల కోసం మాత్రమే పరిపాలిస్తున్నారని పునరుద్ఘాటించారు.

ఇదీ చదవండి : గణతంత్ర దినోత్సవంలో సంజ్ఞల భాష శకటం