నోట్ల రద్దు, జీఎస్టీ వంటి అవివేక నిర్ణయాలు 70ఏళ్లలో ఎవరూ తీసుకోలేదని విమర్శించారు కాంగ్రెస్ అధ్యక్షుడు రాహుల్ గాంధీ. ఉత్తరప్రదేశ్లోని రాయ్బరేలీలో జరిగిన ఎన్నికల ప్రచార సభలో ఆయన ప్రసంగించారు. మోదీ ప్రతి సభలోనూ టెలీప్రాంప్టర్ చూసే మాట్లాడతారని అన్నారు రాహుల్. వెనుక ఉండే కంట్రోలర్ ఏది చెబితే ఆయన అదే ప్రసంగిస్తారని ఎద్దేవా చేశారు.
ఉద్యోగాల భర్తీలో విఫలం
దేశంలో 22లక్షల ప్రభుత్వ ఉద్యోగాలు ఖాళీగా ఉన్నాయని, వాటిని భర్తీ చేయడంలో ప్రధాని మోదీ పూర్తిగా విఫలమయ్యారని ఆరోపించారు రాహుల్ గాంధీ. కేవలం మిత్రుల కోసమే మోదీ పని చేస్తారని విమర్శించారు. తాము అధికారంలో వస్తే 10లక్షల ఉద్యోగాలను ఏడాదిలోనే భర్తీ చేస్తామని హామీ ఇచ్చారు రాహుల్.
20వేలు కట్టకుంటే జైలుకా..
మోదీ హయాంలో వేల కోట్ల రుణాలు ఎగవేసిన విజయ్ మాల్యా, నీరవ్ మోదీ వంటి వారు బయట తిరుగుతుంటే, రూ.20వేల అప్పు తీసుకొని కట్టలేని రైతులను జైలుకు పంపుతున్నారని ఆగ్రహం వ్యక్తం చేశారు రాహుల్ గాంధీ. తమ ప్రభుత్వం వస్తే రైతులపై ఉన్న రుణఎగవేత కేసులన్నీ ఎత్తేస్తామని హామీ ఇచ్చారు.
వాటి గురించి మాట్లాడరే..
దేశంలోని సమస్యలపై మాట్లాడే ధైర్యం ప్రధాని నరేంద్ర మోదీకి లేదని విమర్శించారు రాహుల్ గాంధీ.
" నరేంద్ర మోదీ దేశానికి ఐదేళ్లుగా అబద్ధాలు చెబుతూనే ఉన్నారు. నరేంద్ర మోదీ ప్రసంగాలు వినండి. టెలీప్రాంప్టర్ ఉంటుంది. వెనుక కంట్రోలర్ ఉంటుంది. నరేంద్ర మోదీ మీరు ఉద్యోగాల గురించి మాట్లాడొద్దని కంట్రోలర్ చెబుతుంది. అలాగే రూ.15లక్షల గురించి మాట్లాడొద్దు.. ప్రజలకు కోపమొస్తుందని చెబుతుంది. రైతుల గురించి ప్రస్తావించొద్దని అంటుంది. కంట్రోలర్ వెనుక నుంచి ఆయనను నియంత్రిస్తుంది. ఆయన అదే చెబుతారు. ఇక పరిస్థితి మారుతుంది. నరేంద్ర మోదీ ఓడిపోతారు. కాంగ్రెస్ పార్టీ అధికారంలో వస్తుంది."
-- రాహుల్ గాంధీ, కాంగ్రెస్ జాతీయాధ్యక్షుడు
