రఫేల్ యుద్ధ విమానాలు భారత వైమానిక దళం(ఐఏఎఫ్)లోకి గురువారం లాంఛనంగా చేరనున్నాయి. హరియానాలోని అంబాలా ఎయిర్బేస్లో ఈ కార్యక్రమానికి ఏర్పాట్లు చేసింది రక్షణ శాఖ.
భారత రక్షణ మంత్రి రాజ్నాథ్ సింగ్, ఫ్రాన్స్ రక్షణ మంత్రి ఫ్లోరెన్స్ పార్లీ, ఉన్నత స్థాయి ఆర్మీ అధికారులు ఈ కార్యక్రమంలో పాల్గొననున్నారు. ఇందుకోసం గురువారం ఉదయమే భారత్ చేరుకోనున్నారు పార్లీ.
ఈ కార్యక్రమం అనంతరం ఇరు దేశాల మధ్య పరస్పర రక్షణ సహకారాలను మరింత బలపరుచుకునే అంశంపై రాజ్నాథ్, పార్లీ కీలక చర్చలు జరపనున్నారు.
తొలి దశలో ఐదు విమానాలు..
మొత్తం 36 రఫేల్ యుద్ధ విమానాల కొనుగోలు ఒప్పందంలో భాగంగా తొలి దశలో ఐదు జెట్లు జులై 29న అంబాలా వైమానిక స్థావరానికి చేరుకున్నాయి. ఇప్పటి వరకు మొత్తం 10 జెట్లను భారత్కు అప్పగించగా అందులో ఐదు.. ఐఏఎఫ్ పైలట్లకు శిక్షణ కోసం ఫ్రాన్స్లోనే ఉంచారు.
ఒప్పందం ఇలా..
36 రఫేల్ యుద్ధ విమానాల కొనుగోలు కోసం రూ. 59వేల కోట్లతో 2016లో ఫ్రాన్స్తో ఒప్పందం చేసుకుంది భారత్. 36 రఫేల్ జెట్స్లో 30 యుద్ధ విమానాలు, ఆరు శిక్షణ కోసం వినియోగించేవి ఉన్నాయి. వీటన్నింటిని ఫ్రాన్స్కు చెందిన డసో ఏవియేషన్ రూపొందిస్తోంది.
రఫేల్ జెట్స్ తొలి స్వ్కాడ్రన్ను అంబాలా వైమానిక స్థావరంలో, రెండో స్వ్కాడ్రన్ను బంగాల్లోని హసిమారా స్థావరంలో ఏర్పాటు చేయనున్నారు.
ఇదీ చూడండి:ఓ వైపు ప్రతిష్టంభన.. మరోవైపు సంప్రదింపులు!
