గ్యాంగ్స్టర్ వికాస్ దూబే వ్యవహారంపై రాజకీయ విమర్శలు చెలరేగుతున్నాయి. తాజాగా వికాస్ అరెస్టుపై స్పందించారు కాంగ్రెస్ నేత ప్రియాంక గాంధీ వాద్రా. ఈ కేసులో సీబీఐ విచారణ జరిపించి.. వాస్తవాలను వెలుగులోకి తేవాలని కోరారు.
కాన్పుర్ ఎన్కౌంటర్ ఘటనలో యూపీ ప్రభుత్వం పూర్తిగా విఫలమైందని ఆరోపించారు ప్రియాంక. 8 మంది పోలీసులను బలిగొన్న నిందితులను తక్షణమే పట్టుకోలేకపోయారని విమర్శించారు.
''పటిష్ట భద్రత ఉన్నప్పటికీ.. నేరస్థుడు ఉజ్జయిన్ ఎలా చేరుకున్నాడు. ఇది భద్రతపై అనుమానాలు రేకెత్తిస్తోంది. ఈ కేసులో ఇంకా చాలా విషయాలు దాగున్నాయి. ''
- ప్రియాంక గాంధీ వాద్రా, కాంగ్రెస్ నేత
వికాస్ను పట్టుకున్నారో.. అతడే లొంగిపోయాడో స్పష్టతనివ్వాలని సమాజ్వాదీ పార్టీ అధినేత అఖిలేశ్ యాదవ్ డిమాండ్ చేశారు. అతని కాల్ డేటా బయటకుతీయాలని, అప్పుడే వాస్తవాలు వెలుగులోకి వస్తాయని ట్వీట్ చేశారు.
