కాంగ్రెస్ నేత, రాజ్యసభలో ప్రతిపక్ష నేత గులాం నబీ ఆజాద్ గురించి మాట్లాడుతూ కన్నీటి పర్యంతమయ్యారు ప్రధాని నరేంద్ర మోదీ. వచ్చే వారంలో ఆజాద్ పదవీ విరమణ చేయనున్న తరుణంలో.. ఆయనతో సన్నిహిత సంబంధాలను గుర్తుచేసుకుంటూ పార్లమెంటు ఎగువసభలో భావోద్వేగానికి లోనయ్యారు.
ఫిబ్రవరి 15న గులాం నబీ ఆజాద్ పదవీకాలం ముగుస్తున్న సందర్భంగా సభలో జరిగిన వీడ్కోలు ప్రసంగం ఆద్యంతం ఉద్వేగపూరితంగా సాగింది.
ఆజాద్ కేవలం రాజకీయాలకు మాత్రమే పరిమితం కాకుండా.. దేశం, పార్లమెంటు గురించి కూడా ఆలోచించారని కొనియాడారు ప్రధాని.
''ఆజాద్ తర్వాత.. ఆయన స్థానాన్ని ఎవరు భర్తీ చేస్తారోనని నేను ఆందోళన చెందుతున్నా. ఆయన పనితీరును అందుకోవడం చాలా కష్టం. ఎందుకంటే ఆయన కేవలం తన పార్టీ గురించే ఆలోచించలేదు. దేశం కోసం, పార్లమెంటు కోసం పనిచేశారు. ఇది చిన్న విషయమేమీ కాదు. అంతకుమించి.''
- నరేంద్ర మోదీ, భారత ప్రధానమంత్రి
28 ఏళ్ల ఆయన అనుభవం నుంచి ఎంతో నేర్చుకున్నట్లు తెలిపారు మోదీ. ఆజాద్ తనకు పెద్ద అండగా ఉన్నారని ప్రశంసించారు.
'' అధికారంలో, ప్రతిపక్షంగానూ ఆయనకు అపార అనుభవం ఉంది. జీవితంలో పదవి, అధికారం వస్తుంది. పోతుంది. కానీ .. దానిని ఎలా నిర్వహించాలో ఆజాద్ నుంచి నేర్చుకోవాలి. ఇలా ఉండటం ఆయనకు మాత్రమే చెల్లింది. 28 ఏళ్ల అనుభవం చిన్న విషయమేమీ కాదు.''
- నరేంద్ర మోదీ, భారత ప్రధానమంత్రి
జమ్ముకశ్మీర్ ముఖ్యమంత్రిగా ఆజాద్, గుజరాత్ ముఖ్యమంత్రి మోదీ.. ఉన్న సమయంలో తమ పరస్పర సహకారం గురించి మాట్లాడారు మోదీ. జమ్ముకశ్మీర్లో గుజరాతీ యాత్రికులపై ఉగ్రదాడి జరిగిన సమయంలో.. తనకు తొలుత ఫోన్ చేసింది ఆజాదేనని అన్నారు. ఆ సమయంలో ఆజాద్ కంటతడి పెట్టుకున్నట్లు వ్యాఖ్యానించారు.
అనంతరం.. విమానశ్రయానికి వెళ్లి మృతదేహాలను గుజరాత్ పంపించే వరకు ఆజాద్ అక్కడే ఉన్నారని గుర్తుచేసుకున్నారు.
అందుకు గర్వపడుతున్నా..
స్వాతంత్య్రం అనంతరం పాకిస్థాన్కు వెళ్లని అదృష్టవంతుల్లో తాను కూడా ఉన్నానని అన్నారు ఆజాద్. తాను హిందుస్థానీ ముస్లిం కావడం గర్వంగా ఉందన్నారు. రాజ్యసభలో జమ్ముకశ్మీర్లో ఉగ్రవాదం గురించి వివరిస్తూ ఆజాద్ భావోద్వేగానికి గురయ్యారు. దేశంలో తీవ్రవాదం అంతం కావాలని దేవుడ్ని ప్రార్థిస్తున్నానంటూ చెమర్చిన కళ్లతో ఆజాద్ కోరుకున్నారు.
వీడ్కోలు సందర్భంగా సభ్యులందరితో తనకున్న అనుబంధాన్ని గుర్తుచేసుకున్న ఆజాద్, వారందరి సహకారానికి ధన్యవాదాలు తెలిపారు. పార్లమెంటు గేట్కీపర్ నుంచి.. ఛాంబర్ లోపల ఉండే వ్యక్తుల వరకూ, ఛైర్మన్, సెక్రటేరియట్, పార్లమెంట్ సభ్యులందరినీ ఎంతో మిస్ అవుతానని ఉద్వేగంతో మాట్లాడారు.
తన పదవీ విరమణ సందర్భంగా ప్రధానమంత్రి నరేంద్ర మోదీ చేసిన ప్రసంగానికి ధన్యవాదాలు తెలుపుతున్నట్లు ఆజాద్ వెల్లడించారు. సభలో తాను చేసిన వ్యాఖ్యలను ప్రధాని ఎప్పుడూ వ్యక్తిగతంగా తీసుకోలేదని పేర్కొన్న ఆజాద్.. వ్యక్తిగత విషయాలను, రాజకీయాలను మోదీ ఎప్పుడూ వేరువేరుగా చూస్తారని గుర్తుచేశారు.
రాజ్యసభ ఎంపీలు గులాం నబీ ఆజాద్, మిర్ మొహమ్మద్ ఫయాజ్, షాంసెర్ సింగ్, నజిర్ అహ్మెద్ లావయ్లు ఫిబ్రవరి 15న పదవీ విరమణ పొందనున్నారు.
ఇదీ చూడండి: అభిమాని సైకిల్ యాత్రకు సోనూసూద్ ఫిదా
