ఎన్​ఆర్​సీలో మాజీ రాష్ట్రపతి కుటుంబీకుల పేర్లు గల్లంతు

ఫక్రుద్దీన్​ అలీ అహ్మద్​... భారత మాజీ రాష్ట్రపతి. అసోంలోని ఆయన కుటుంబ సభ్యులకు శనివారం విడుదల చేసిన ఎన్​ఆర్​సీ తుది జాబితాలో చోటుదక్కలేదు. పలు రికార్డుల్లో తమ పుర్వీకుల పేర్లు తప్పుగా పలకడమే ఇందుకు కారణంగా తెలుస్తోంది.

శనివారం విడుదలైన అసోం ఎన్​ఆర్​సీపై సర్వత్రా విమర్శలు వస్తున్నాయి. దాదాపు 19 లక్షల మందికి ఈ జాబితాలో చోటు దక్కకపోవడంపై నిరసనలు వ్యక్తమవుతున్నాయి. మాజీ రాష్ట్రపతి ఫక్రుద్దీన్ అలీ అహ్మద్​ కుటుంబీకుల పేర్లూ ఎన్​ఆర్​సీలో లేకపోవడం చర్చనీయాంశమైంది.

భారత 5వ రాష్ట్రపతి ఫక్రుద్దీన్​ అలీ అహ్మద్​ సోదరుడు ఎహ్​త్రాముద్దీన్​ కుటుంబ సభ్యుల పేర్లు ఎన్​ఆర్​సీలో లేవు. జియాఉద్దీన్(ఎహ్​త్రాముద్దీన్​ కుమారుడు) కుటుంబం ఎన్నో ఏళ్లుగా అసోంలోని కామ్​రూప్​ జిల్లాలో నివసిస్తోంది. మాజీ రాష్ట్రపతి సహా తమ పూర్వీకుల పేర్లు 1951 ఎన్​ఆర్​సీలో కనపడకపోవడంపై జియాఉద్దీన్​ కుటుంబం ఆశ్చర్యపోయింది. 1971 ముందు వరకు ఉన్న ఓటరు జాబితాల్లోనూ వీరి పేర్లు లేవు. అందుకే వీరు ఈసారి ఎన్​ఆర్​సీకి నమోదు చేసుకోలేకపోయారు. ​

ఎన్​ఆర్​సీలో తమ కుటుంబంలోని 8 మంది పేర్లు లేవని జియాఉద్దీన్​ కుమారుడు సాజిద్​ అలీ అహ్మద్​ వెల్లడించారు. కొన్ని రికార్డుల్లో ఎహ్​త్రాముద్దీన్​ అహ్మద్​ పేరు తప్పుగా పలకడమే ఇందుకు కారణమని రిపోర్టులు స్పష్టం చేశాయి.

"మా పేరు జాబితాలో లేకపోవడం ఎంతో బాధ కలిగించింది. మా నాన్న జియాఉద్దీన్​ అలీ అహ్మద్​.. మా తాత పేరు ఎహ్​త్రాముద్దీన్​ అలీ అహ్మద్. మాజీ రాష్ట్రపతి ఫక్రుద్దీన్​ అలీ అహ్మద్​కు మా తాత తమ్ముడు. నేను ఫక్రుద్దీన్​ ముని మనుమడిని. మా తాత పేరు 'అక్రమ్' అని కొన్ని రికార్డుల్లో ఉంది. మా వారసత్వ డేటాను చూశాం. మా ముత్తాత పేరు చూస్తే జల్​నుర్​ అలీ అహ్మద్​ అని ఉంది. జల్​నూర్​ అలీ అహ్మద్​ కుమారుడి పేరు ఎహ్​త్రాముద్దీన్​ అలీ అహ్మద్​ అని డేటాలో ఉంది. పేరును సరిచేయడానికి కోర్టును ఆశ్రయించాం."
-- సాజిద్​ అలీ అహ్మద్​, ఫక్రుద్దీన్​ ముని మనుమడు.

ఓ వ్యక్తి లేదా అతని పూర్వీకులు 1971 మార్చి 24కు ముందే భారత్​కు వచ్చారని ఆధారాలు చూపిస్తేనే ఎన్​ఆర్​సీ జాబితాలో పేర్లు ఉంటాయి. ఈ ఆధారాలను మాజీ రాష్ట్రపతి బంధువులు చూపించలేకపోవడం వల్లే ఎన్​ఆర్​సీ తుది జాబితాలో చోటు దక్కలేదు.

ఇదీ చూడండి:- అసోం ఎన్​ఆర్​సీపై దేశవ్యాప్తంగా అసమ్మతి స్వరాలు