రెండోసారి ప్రధానిగా తొలి విదేశీ పర్యటన అక్కడే

ప్రధానమంత్రి నరేంద్ర మోదీ తొలి విదేశీ పర్యటన తేదీ ఖరారైంది. మోదీ ఈ నెల 8న తొలుత మాల్దీవుల్లో, 9న శ్రీలంకలో పర్యటిస్తారు. ప్రధాని పర్యటన వివరాలను విదేశాంగ శాఖ అధికారికంగా ప్రకటించింది.

రెండోసారి ప్రధానమంత్రి బాధ్యతలు చేపట్టిన అనంతరం నరేంద్ర మోదీ తొలి విదేశీ పర్యటన తేదీ ఖరారైంది. ఈ మేరకు విదేశాంగ శాఖ ప్రకటించింది. ఈ నెల 8,9 తేదీల్లో మాల్దీవులు, శ్రీలంకలో మోదీ పర్యటిస్తారని వెల్లడించింది. పొరుగు దేశాలకు భారతదేశం ఇచ్చే ప్రాధాన్యతను ఈ పర్యటనలు ప్రతిబింబిస్తాయని స్పష్టం చేసింది విదేశాంగ శాఖ.

"అధ్యక్షుల ఆహ్వానం మేరకు మాల్దీవులు, శ్రీలంకలో ప్రధాని మోదీ పర్యటిస్తారు. ఈ పర్యటనలు ఆ దేశాలతో ద్వైపాక్షిక సంబంధాల అభివృద్ధిని సమీక్షించడానికి ఉపయోగపడతాయి."
--- విదేశాంగ శాఖ.

మాల్దీవుల పర్యటనలో భాగంగా ప్రధాని ఆ దేశ పార్లమెంటులో ప్రసంగించనున్నారు. ఈ మేరకు మాల్దీవుల పార్లమెంటు ఇప్పటికే ప్రసంగానికి సంబంధించిన తీర్మానాన్ని ఆమోదించింది.

ఇదీ చూడండి: 'బ్యాలెట్​ పేపర్లకై విపక్ష పార్టీలు డిమాండ్​ చేయాలి'