విద్యుత్​​ కాంతుల్లో సరికొత్తగా పార్లమెంట్​

దేశ రాజధాని దిల్లీ.. స్వాతంత్ర్య దినోత్సవ వేడుకలకు సిద్ధమైంది. ఈ సందర్భంగా పార్లమెంట్​ భవనం విద్యుత్​ కాంతులతో కొత్త అందాలను సంతరించుకుని విరాజిల్లుతోంది.

భారత ప్రజాస్వామ్య వ్యవస్థకు దేవాలయం లాంటి పార్లమెంటు భవనం స్వాతంత్ర్య దినోత్సవం నేపథ్యంలో కొత్త వెలుగులతో భాసిల్లుతోంది. ఈ మేరకు నూతనంగా ఏర్పాటుచేసిన అత్యాధునిక విద్యుత్​ దీపాల వ్యవస్థను ప్రధానమంత్రి నరేంద్ర మోదీ మంగళవారం రాత్రి లాంఛనంగా ప్రారంభించారు. ఈ కార్యక్రమంలో లోక్​సభ స్పీకర్​ ఓం బిర్లా, కేంద్ర మంత్రులు, పార్లమెంటు సభ్యులు పాల్గొన్నారు.

పార్లమెంటు భవనానికి ఉన్న 144 స్తంభాలకు మొత్తం 875 ఎల్​ఈడీ విద్యుత్తు దీపాలను అమర్చామని, ఇవి ప్రతి కొన్ని సెకన్లకు విభిన్న కాంతులను వెదజల్లుతాయని లోక్​సభ సచివాలయం పేర్కొంది. ఈ దీపాలు సాధారణ దీపాలతో పోల్చితే ఐదో వంతు విద్యుత్తుతో పనిచేస్తాయని వివరించింది. సౌత్​, నార్త్ బ్లాక్​లు, రెసినా హిల్స్​లలో కూడా ఇలాంటి వ్యవస్థలు ఏర్పాటు చేశారు.