1965, 1971 యుద్ధాల తరహాలో పాకిస్థాన్ దుస్సాహసానికి పాల్పడితే భారీ మూల్యం చెల్లించక తప్పదని హెచ్చరించారు రక్షణ మంత్రి రాజ్నాథ్ సింగ్. పాకిస్థాన్ భూభాగంలో తీవ్ర స్థాయిలో మానవ హక్కుల ఉల్లంఘన జరుగుతోందని, అదే ఆ దేశానికి శాపంగా మారుతుందని జోస్యం చెప్పారు.
బిహార్ రాజధాని పట్నాలో భాజపా నిర్వహించిన జన్ జాగరణ్ సభలో ప్రసంగించారు రాజ్నాథ్.
"జాతి, మతం, సిద్ధాంతం ఆధారంగా ఏర్పడిన పాకిస్థాన్ పరిస్థితి ఏమైంది? 1971లో పాక్, బంగ్లాదేశ్ రెండు భాగాలుగా విడిపోయాయి. బలూచిస్థాన్ ప్రజలు, పస్థునియుల మానవహక్కుల ఉల్లంఘన జరుగుతూ ఉంటే ఆ దేశాన్ని ఖండఖండాలుగా విడగొట్టినా ఎలాంటి నష్టం లేదు. పాక్ను విడగొట్టే అవసరం ఎవరికీ లేదు. దానికదే నష్టం చేకూర్చుకుంటూ విడిపోతుంది. ఇలాంటి వర్గ రాజకీయాలు చేయడం ఎవరికీ మంచిది కాదు."
-రాజ్నాథ్ సింగ్, రక్షణ మంత్రి
370వ అధికరణ రద్దును ప్రస్తావించారు రాజ్నాథ్. ఆ నిర్ణయానికి జమ్ముకశ్మీర్లోని నాలుగింట మూడొంతుల మందికిపైగా ప్రజలు మద్దతిస్తున్నారని చెప్పారు. కశ్మీర్లో అశాంతి సృష్టించే లక్ష్యంతో పాకిస్థాన్ సీమాంతర ఉగ్రవాదాన్ని ప్రోత్సహిస్తే చూస్తూ ఊరుకోబోమని హెచ్చరించారు.
ఇదీ చూడండి: మోదీజీ... పాక్ చెర నుంచి రక్షించండి: సింధి సంఘాలు
