విదేశాల్లో చిక్కుకుపోయిన భారతీయులను తీసుకురావడానికి ఏర్పాటు చేసిన 'వందే భారత్ మిషన్' ప్రారంభించిన నాటి నుంచి ఇప్పటివరకు 1.07లక్షల మందికి పైగా భారత్కు తీసుకొచ్చినట్లు విదేశాంగ శాఖ తెలిపింది. జూన్ 13న రెండో దశ తరలింపు పూర్తయిన తర్వాత మూడో దశ మిషన్ కోసం ప్రభుత్వం సన్నాహాలు ప్రారంభించనున్నట్లు వెల్లడించింది.
"మూడో దశలో 337 విమాన సర్వీసుల ద్వారా 31దేశాల నుంచి సుమారు 38,000మందిని స్వదేశానికి తీసుకురావాలని భావిస్తున్నాం."
-అనురాగ్ శ్రీవాస్తవ, విదేశీ వ్యవహారాల మంత్రిత్వ శాఖ ప్రతినిధి
జూన్ 13 వరకు రెండో దశ
మే 7 నుంచి మే 15 వరకు తొలిదశలో 12దేశాల నుంచి 15,000మందిని స్వదేశానికి తీసుకొచ్చినట్లు శ్రీవాస్తవ తెలిపారు. అనంతరం మే 17 నుంచి మే 22 వరకు రెండో దశగా నిర్ణయించారు. అయితే దీనిని జూన్ 13 వరకు పెంచినట్లు అధికారులు వెల్లడించారు. ఈ దశలో 103 విమానాల ద్వారా విదేశాల్లో చిక్కుకున్న భారతీయులను స్వదేశానికి తరలిస్తున్నట్లు శ్రీవాస్తవ తెలిపారు. శ్రీలంక, మాల్దీవుల్లో చిక్కుకుపోయిన భారతీయులను... భారతీయ నౌకల ద్వారా స్వదేశానికి తరలిస్తున్నామని చెప్పారు.
లక్ష మందికి పైగా
'వందే భారత్ మిషన్లో భాగంగా మే 7 నుంచి ఇప్పటివరకు 454 విమానాల ద్వారా 1,07,123 మందిని స్వదేశానికి తరలించాం. వారిలో 17,485మంది వలసకార్మికులు, 11,511మంది విద్యార్థులు, 8,633మంది వృత్తినిపుణులు ఉన్నారు'
- శ్రీవాస్తవ
భారత్ సరిహద్దు దేశాలైన బంగ్లాదేశ్, నేపాల్, భూటన్ల నుంచి 32,000 మంది భారతీయలను రహదారి మార్గం గుండా వచ్చినట్లు విదేశాంగ శాఖ తెలిపింది. 3,48,565 మంది తమను స్వదేశానికి తీసుకురావాలని అభ్యర్థించినట్టు వెల్లడించింది.
ఇదీ చూడండి: మహారాష్ట్రలో రికార్డు స్థాయి కరోనా మరణాలు
