ఫొని తుపాను...ఒడిశా, పశ్చిమ్ బంగ రాష్ట్రాలను గడగడ వణికించింది. వేలాదిమందిని నిరాశ్రయులుగా మార్చిందీ తుపాను. రాష్ట్రంలో మే 3న ఫొని సృష్టించిన బీభత్సం కారణంగా 29మంది ప్రాణాలు కోల్పోయారు. ఈ తుపానుతో ప్రకృతికి పెనుముప్పే వాటిల్లింది. భువనేశ్వర్, పూరీల్లో సుమారు 10 లక్షల చెట్లు నేలమట్టమయ్యాయి. ముఖ్యంగా భువనేశ్వర్లో రెండు దశాబ్దాలుగా చూస్తున్న చెట్లతో అనేకమందికి మానసిక అనుబంధం ఉంది.
"రహదారులపై కూలిన చెట్లను చూస్తే కన్నీరు ఉబుకుతోంది. వాటిని మా పిల్లల్లా పెంచాం. పాక్షిక నష్టం సంభవించిన చెట్లను నిలబెట్టేందుకు ప్రయత్నిస్తున్నాం. ఇప్పటివరకూ 40 మందితో బృందంగా ఏర్పడి గత నాలుగు రోజులుగా 800 చెట్లను నిలబెట్టాం. ఇప్పుడు ప్రకృతికి జరిగిన నష్టాన్ని అంచనావేయలేం. మొత్తం పచ్చదనం పోయింది."
-అశోక్ మిశ్రా, ప్రాంతీయ అటవీ అధికారి
నాయపల్లి ప్రాంతానికి చెందిన ఓ కుటుంబం తమ మామిడి చెట్టు నేలకూలినందుకు విలపిస్తున్నారు. ఆ చెట్టును తన నానమ్మ నాటినట్లుగా పేర్కొన్నారు.
ప్రస్తుతం పెద్దసంఖ్యలో మొక్కలు నాటే కార్యక్రమాన్ని చేపట్టాల్సి ఉంది. ప్రకృతి విపత్తులను తట్టుకుని జీవించగలిగే మొక్కలు నాటాలని యోచిస్తోంది ఒడిశా అటవీ శాఖ. కూలిన చెట్లను డంప్యార్డ్కు తరలిస్తున్నారు.
స్వచ్ఛంద సంస్థలు, జాతీయ విపత్తు సహాయక దళం, ఒడిశా విపత్తు సహాయక దళాలు భువనేశ్వర్ను తిరిగి పూర్వస్థితికి తీసుకొచ్చేందుకు శ్రమిస్తున్నాయి. 445 మంది పారిశుద్ధ్య కార్మికులు 10 వార్డుల్లో పనులు చేస్తుండగా, ఏజెన్సీ ప్రాంతాల్లోని 57 వార్డుల్లో 2306 మంది సేవలందిస్తోన్నారు.
తుపాను సహాయక కంట్రోల్ రూమ్ను నిర్వహిస్తోంది భువనేశ్వర్ మున్సిపల్ కార్పొరేషన్. ప్రతి విభాగానికి చెందిన ఒక్కో ఉద్యోగి ఫోన్లను అందుకుంటూ సేవలను ముమ్మరం చేస్తున్నారు.
ఇదీ చూడండి: 'రఫేల్' రివ్యూ పిటిషన్లపై నిర్ణయం వాయిదా
