రైతుల ట్రాక్టర్ ర్యాలీలో భాగంగా దిల్లీలోని ఐటీఓ వద్ద ఆందోళనలో ఒక రైతు మరణించాడు. ఈ ఘటనకు పోలీసులే కారణమని మృతుని బంధువులు ఆరోపించారు. అయితే ప్రమాదవశాత్తు ట్రాక్టర్ తిరగబడటం వల్లే ఐటీవో వద్ద రైతు మృతి చెందాడని పోలీసులు ప్రకటించారు. తమ కాల్పుల్లో రైతు మరణించాడన్న ఆరోపణలను ఖండించారు. మృతుడి ఒంటిపై బుల్లెట్ గాయాలు లేవని స్పష్టం చేశారు.
మృతదేహంతో నిరసన..
మరోవైపు రైతు మృతదేహాన్ని పోస్ట్ మార్టంకు తరలించకుండా అడ్డుకున్న రైతులు.. జాతీయ జెండా కప్పి ఐటీఓ క్రాసింగ్ వద్ద నిరసనకు దిగారు. ఈ ఘటనలో మీడియాపైనా రైతులు విరుచుకుపడ్డారు.
ర్యాలీలో భాగంగా పోలీసు ప్రధాన కార్యాలయానికి ఎదురుగా ఉన్న బారికేడ్లను దాటుకొని ముందుకెళ్లారు రైతులు. రైతులను చెదరగొట్టేందుకు పోలీసులు.. బాష్పవాయువును ప్రయోగించారు.
ఈ నేపథ్యంలో ఐటీఓ వద్ద జరిగిన ఘర్షణల్లో రైతు మృతి చెందాడు. ఆగ్రహంతో పోలీసులను పరుగెత్తించిన అన్నదాతలు. పోలీసు వాహనాలను ధ్వంసం చేశారు.
ఐటీఓ సర్కిల్లో దిల్లీ ప్రజా రవాణా బస్సును సైతం ధ్వంసం చేశారు.
ఇదీ చదవండి: ట్రాక్టర్ ర్యాలీలో ఉద్రిక్తత- రైతులపై లాఠీఛార్జ్
