మహారాష్ట్ర మాజీ ముఖ్యమంత్రి దేవేంద్ర ఫడణవీస్కు కొత్త చిక్కులు మొదలయ్యాయి. పాత కేసులకు సంబంధించి నాగ్పుర్ కోర్టు ఆదేశాలతో పోలీసులు సమన్లు జారీ చేశారు. మహారాష్ట్రలో కూటమి ప్రభుత్వం ఏర్పడిన రోజే ఈ సమన్లు జారీ కావటం గమనార్హం.
2014 ఎన్నికల నాటి అఫిడవిట్లో తనపై పెండింగ్లో ఉన్న రెండు క్రిమినల్ కేసుల వివరాలను వెల్లడించలేదని ఆయనపై న్యాయవాది సతీశ్ వ్యాజ్యం దాఖలుచేశారు. ఈ విషయంలో ముంబై హైకోర్టులో ఫడణవీస్కు ఊరట లభించింది. ఈ తీర్పును సవాలు చేస్తూ సుప్రీం కోర్టును ఆశ్రయించారు సతీశ్.
సుప్రీం కోర్టు ఆదేశాలతో...
ముంబయి హైకోర్టు తీర్పును కొట్టివేస్తూ వ్యాజ్యాన్ని పునఃపరిశీలనకు తీసుకోవాలని విచారణ కోర్టును 2019 అక్టోబర్ 1న ఆదేశించింది అత్యున్నత న్యాయస్థానం. ఈ నేపథ్యంలో తాజాగా సమన్లు జారీ చేసింది నాగ్పుర్ కోర్టు.
ఫడణవీస్పై 1996లో మోసపూరిత నేరం, 1998లో ఫోర్జరీ కేసు నమోదయ్యాయి. ఈ వివరాలను ఆయన 2014 ప్రమాణ పత్రంలో పొందుపరచలేదు.
కొత్త ఇంటి వేటలో..
ముఖ్యమంత్రి పదవికి రాజీనామా చేసిన తర్వాత దక్షిణ ముంబయిలోని అధికారిక నివాసాన్ని ఖాళీ చేయనున్నారు ఫడణవీస్. ఆయన స్వస్థలం నాగ్పుర్. ఫడణవీస్ భార్య అమృత ముంబయిలోనే ఓ ప్రముఖ బ్యాంకులో పనిచేస్తున్నారు. కుమార్తె కూడా అక్కడే చదువుతోంది. ఈ కారణాలతో ముంబయిలో ఉండేందుకు నిర్ణయం తీసుకున్నారు. ఇందుకోసం కొత్త ఇంటి వేటలో ఉన్నారాయన.
ఇదీ చూడండి: మహారాష్ట్ర ముఖ్యమంత్రిగా శివసేనాని 'ఠాక్రే'
