కశ్మీర్ సమస్య పరిష్కారానికి మధ్యవర్తిత్వం వహిస్తానని అమెరికా అధ్యక్షుడు డొనాల్డ్ ట్రంప్ చేసిన వ్యాఖ్యలపై పార్లమెంట్ ఉభయసభలు అట్టుడికాయి. ట్రంప్ వ్యాఖ్యలపై ప్రధాని నరేంద్ర మోదీ స్వయంగా వివరణ ఇవ్వాలని రాజ్యసభలో విపక్షాలు పట్టుబట్టాయి. ఈ అంశంపై పెద్దల సభలో వివరణ ఇచ్చిన విదేశాంగమంత్రి జైశంకర్, ప్రధాని కశ్మీర్ అంశంలో మధ్యవర్తిత్వం చేయమని ట్రంప్ను కోరలేదని స్పష్టం చేశారు.
"అమెరికా అధ్యక్షుడు డొనాల్డ్ ట్రంప్, పాకిస్థాన్ ప్రధాని ఇమ్రాన్ఖాన్తో సమావేశం అయ్యారు. ఆ సందర్భంగా మీడియాతో మాట్లాడుతూ... భారత్, పాకిస్థాన్లు కోరితే కశ్మీర్ సమస్య పరిష్కారానికి మధ్యవర్తిత్వం చేయడానికి సుముఖంగా ఉన్నట్లు చెప్పారు. ప్రధాని మోదీ కశ్మీర్ విషయంలో సాయం చేయమని ట్రంప్ను ఏనాడూ కోరలేదు. ఈ విషయాన్ని సభకు స్పష్టం చేస్తున్నాను. ఇరుదేశాల మధ్య ఉన్న సమస్యలను భారత్ ఎప్పుడైనా ద్వైపాక్షిక చర్చల ద్వారా మాత్రమే పరిష్కరించుకుంటుంది."-జైశంకర్, భారత విదేశాంగమంత్రి
ట్రంప్ వ్యాఖ్యలపై దద్దరిల్లిన పార్లమెంట్
సొంత మంత్రిని నమ్మరా
మంత్రి జైశంకర్ వివరణ ఇచ్చినా విపక్షాలు సంతృప్తి చెందలేదు. ఈ పరిణామంపై రాజ్యసభ ఛైర్మన్ వెంకయ్యనాయుడు అసహనం వ్యక్తం చేశారు. విదేశీ నేత చెప్పిన మాటలను విశ్వసిస్తున్న మీరు (విపక్షాలు)... సొంత మంత్రి (జైశంకర్) మాటలను నమ్మలేరా అని వ్యాఖ్యానించారు.
మోదీ స్వయంగా చెప్పాల్సిందే
వెంకయ్య అసహనాన్నీ విపక్షాలు పట్టించుకోలేదు. 'ప్రధానమంత్రి జవాబ్ దో' అంటూ నినాదాలు చేశారు. దీంతో సభను 12 గంటల వరకు వాయిదా వేశారు రాజ్యసభ ఛైర్మన్ వెంకయ్యనాయుడు. తిరిగి ప్రారంభమైనప్పటికీ విపక్షాలు పట్టువీడకుండా నినాదాలు చేశాయి. తప్పనిపరిస్థితుల్లో సభ మధ్యాహ్నం 2 గంటల వరకు సభ వాయిదా పడింది.
లోక్సభలోనూ రగడ
ఈ విషయంపై దిగువ సభలోనూ విపక్షాలు నిరసన చేపట్టాయి. స్పందించిన లోక్సభ స్పీకర్ ఓం బిర్లా, ఇది దేశానికి సంబంధించిన అంశమని, దీనిని రాజకీయం చేయవద్దని కోరారు. దేశ ప్రయోజనాలను కాపాడాలని విజ్ఞప్తి చేశారు.
విపక్ష సభ్యులు దేశ ప్రతిష్ఠ దెబ్బతినేలా ప్రవర్తిస్తున్నారని, ఇది ఏమాత్రం ఆమోదయోగ్యం కాదని, పార్లమెంటరీ వ్యవహారల మంత్రి ప్రహ్లాద్ జోషి అన్నారు. అయినా విపక్షాలు పట్టువీడలేదు.
ఇదీ చూడండి: ఛత్తీస్గఢ్లో ఎన్కౌంటర్- నక్సల్ మృతి
