దేశవ్యాప్తంగా సంచలనం సృష్టించిన నిర్భయ అత్యాచారం, హత్య కేసులో దోషులను ఉరి తీసేందుకు ఏర్పాట్లు ముమ్మరంగా సాగుతున్నాయి. సమయం దగ్గర పడుతున్న క్రమంలో మరణశిక్ష అమలు చేసేందుకు ఎంపికైన తలారి పవన్ జల్లాద్ గురువారం తిహార్ జైలుకు చేరుకోనున్నారు. ఉత్తర్ప్రదేశ్ మేరఠ్ నుంచి దిల్లీకి ప్రత్యేక వాహనంలో తీసుకువచ్చేందుకు అధికారులు ఏర్పాట్లు చేశారు.
భారీ భద్రత నడుమ..
పవన్ జల్లాద్ను జైలుకు తరలించేందుకు భారీ భద్రత ఏర్పాటు చేసినట్లు అధికారులు తెలిపారు. సుమారు 15-20 మంది సాయుధ పోలీసులు భద్రత కల్పిస్తారని.. ఇందుకోసం అత్యంత పటిష్ఠమైన జైలు వ్యాన్ను వినియోగించనున్నట్లు వెల్లడించారు.
"భారీ భద్రత మధ్య తలారి పవన్ జల్లాద్ను గురువారం ఉదయం తిహార్ జైలుకు తీసుకొస్తాం. దిల్లీకి చేరుకున్న వెంటనే జైలులో ఉరి అమలు చేసే విభాగానికి తరలిస్తాం."
- సందీప్ గోయల్, తిహార్ జైలు డైరెక్టర్ జనరల్.
మేరఠ్ నుంచి దిల్లీకి ఏ మార్గంలో తరలించాలో ఇప్పటికే నిర్ణయించారు అధికారులు. అయితే.. అందులో మార్పు ఉండొచ్చని చెబుతున్నారు. దిల్లీ పోలీసులతోపాటు తమిళనాడు ప్రత్యేక దళం ఇందులో పాల్గొనుంది.
ఫిబ్రవరి 1న..
నలుగురు దోషుల్లో ఒకడైన ముకేశ్.. క్షమాభిక్ష తిరస్కరణను సవాలు చేస్తూ సుప్రీంకోర్టులో వ్యాజ్యం వేయగా దానిని న్యాయస్థానం కొట్టి వేసింది. మరో దోషి అక్షయ్ క్యురేటివ్ పిటిషన్ దాఖలు చేశాడు. దీనిపైనా స్పష్టత వచ్చి, న్యాయపరమైన అడ్డంకులన్నీ తొలిగిపోతే.. నలుగురు దోషులను ఫిబ్రవరి 1న ఉదయం 6 గంటలకు ఉరి తీయనున్నట్లు అధికారులు చెబుతున్నారు.
నలుగురు దోషులు ముకేశ్(32), పవన్ గుప్తా(25), వినయ్ శర్మ(26), అక్షయ్ సింగ్ (31)లను వారి బంధువులు, కుటుంబ సభ్యులు గత మంగళవారం కలిశారు.
ఇదీ చూడండి: సుప్రీంలో నిర్భయ దోషికి చుక్కెదురు- వ్యాజ్యం కొట్టివేత
