మెరుగైన వైద్యం పేరుతో ఉరిశిక్షను ఆలస్యం చేసేందుకు నిర్భయ కేసు దోషి వినయ్ శర్మ వేసిన ఎత్తుగడ చిత్తయింది. అతడి వ్యాజ్యాన్ని దిల్లీ కోర్టు కొట్టివేసింది.
వినయ్ శర్మ మానసిక స్థితి సరిగా లేదన్న వాదన పూర్తిగా అవాస్తమని దిల్లీ కోర్టుకు స్పష్టంచేశారు తిహార్ జైలు అధికారులు. మెరుగైన వైద్యం అందించాలని వినయ్ దాఖలు చేసిన పిటిషన్పై ఈమేరకు కౌంటర్ దాఖలు చేశారు. సీసీటీవీ కెమెరాల్లో నమోదైన దృశ్యాలు చూస్తే ఈ విషయం అర్థమవుతుందని కోర్టుకు నివేదించారు.
"దోషి వినయ్శర్మ వాదనలన్నీ అవాస్తవాలు. అతడికి వైద్య పరీక్షలు నిర్వహించాం. తలకు ఓ గాయమైంది. దానికి చికిత్స అందించాం. వినయ్శర్మ గాయాలన్నీ కావాలని చేసుకున్నవే. అతడికి ఏ మానసిక వ్యాధి లేదని వైద్య నివేదికలు స్పష్టం చేస్తున్నాయి. ఈ అంశమై అతడికి వైద్య పరీక్షలు అవసరం లేదు. జైలు డాక్టర్లు అతడిని రోజూ పరీక్షిస్తున్నారు."
-తిహార్ జైలు వాదన
తిహార్ జైలు అధికారుల వాదనను దిల్లీ కోర్టు పరిగణనలోకి తీసుకుంది. వినయ్ వ్యాజ్యాన్ని కొట్టివేసింది. ఉరిశిక్ష పడినవారిలో ఆ మాత్రం ఆందోళన, కుంగుబాటు సహజమేనని వ్యాఖ్యానించింది. దోషులకు తగిన చికిత్స అందుతోందని స్పష్టంచేసింది.
నిర్భయ కేసు నలుగురు దోషులను మార్చి 3న ఉరి తీయాలని ఇటీవలే డెత్ వారెంట్ జారీ చేసింది దిల్లీ కోర్టు.
ఇదీ చూడండి: నిర్భయ: దిల్లీ కోర్టుకు వినయ్.. వైద్యం కోసం వినతి
