మధ్యప్రదేశ్లో రాజకీయ అనిశ్చితి నడుమ భాజపా ప్రభుత్వం ఏర్పాటైనప్పటికీ మంత్రివర్గ విస్తరణ జరగలేదు. రాష్ట్రంలో కరోనా వైరస్ విస్తరిస్తన్న నేపథ్యంలో ముఖ్యమంత్రి శివరాజ్ సింగ్ చౌహాన్పై విపక్షాలు విమర్శలు చేశాయి. రాష్ట్రంలో ఆరోగ్య శాఖ సహా ఇతర శాఖల్లో మంత్రులు లేకపోవటంపై అసహనం వ్యక్తం చేశాయి. ఈ నేపథ్యంలో నేడు మంత్రివర్గ విస్తరణ చేపట్టనున్నారని ఆ పార్టీ వర్గాలు తెలిపాయి.
" నేడు (మంగళవారం) మధ్యాహ్నం సమయానికి మంత్రివర్గ విస్తరణ జరుగుతుంది. అయితే.. తొలి కేబినెట్ విస్తరణలో కొద్ది మందికే చోటు లభించే అవకాశం ఉంది. "
- పార్టీ వర్గాలు
5-6 మందికి చోటు!
ప్రస్తుతం మంత్రివర్గంలోకి ఎంతమందిని తీసుకుంటారనే అంశంపై స్పష్టత లేదు. నేడు మధ్యాహ్నానికి ఈ సంఖ్యపై పూర్తిస్థాయిలో స్పష్టత వచ్చేఅవకాశం ఉంది. అయితే.. 5 నుంచి 6 మందిని కేబినెట్లోకి తీసుకుంటారని భాజపా వర్గాలు పేర్కొన్నాయి.
28 రోజుల రికార్డ్..
రాష్ట్రంలో కాంగ్రెస్ పార్టీ అధికారానికి దూరమైన నేపథ్యంలో.. మార్చి 23న మధ్యప్రదేశ్ ముఖ్యమంత్రిగా నాలుగోసారి ప్రమాణం చేశారు శివరాజ్సింగ్ చౌహాన్. అయితే.. రాష్ట్రంలో కరోనా వైరస్ వ్యాప్తి, ఇతర కారణాలతో కేబినెట్ విస్తరణ చేయలేకపోయారు. 28 రోజుల పాటు ఏక సభ్య కేబినెట్గా కొనసాగిస్తూ.. రికార్డ్ సృష్టించారు. అంతకుముంది ఈ రికార్డ్ కర్ణాటక ముఖ్యమంత్రి యడియూరప్ప పేరిట ఉంది.
రాష్ట్రపతికి ఫిర్యాదు..
రాష్ట్రంలో పూర్తిస్థాయి మంత్రివర్గం లేకపోవటంపై రాష్ట్రపతి రామ్నాథ్ కోవింద్కు సోమవారం ఫిర్యాదు చేశారు కాంగ్రెస్ సీనియర్ నేత కపిల్ సిబల్, వివేక్ తాంఖ. రాజ్యాంగ విరుద్ధంగా ప్రభుత్వాన్ని నడుపుతున్నారని ఆరోపించారు.
భాజపాకు కత్తిమీదసామే!
ప్రస్తుతం మంత్రివర్గంలోకి కొద్ది మందిని మాత్రమే తీసుకునే ఆలోచనలో ఉన్న నేపథ్యంలో కాంగ్రెస్ పార్టీకి రాజీనామా చేసిన జోతిరాదిత్య సింధియా వర్గం ఎమ్మెల్యేల విషయంలో భాజపాకు కత్తిమీద సామే అని తెలుస్తోంది. కమల్నాథ్ ప్రభుత్వంలో మంత్రులుగా కొనసాగిన ఆరుగురు సహా 16 మంది ఎమ్మెల్యేల్లో ఎవరిని మంత్రివర్గంలోకి తీసుకుంటారు అనేది ఆసక్తిగా మారింది. ప్రస్తుతం మాజీ ఆరోగ్య శాఖ మంత్రి తులసి సిలావత్ పేరు గట్టిగా వినిపిస్తోంది.
ఇదీ చూడండి: తండ్రి అంత్యక్రియలకు ముఖ్యమంత్రి దూరం
