పోలీసు కుక్కల బదిలీ వ్యవహారం మధ్యప్రదేశ్లో రాజకీయ వివాదంగా మారింది. కమల్నాథ్ ప్రభుత్వం ఇటీవల 46 మంది పోలీసు శునకాల శిక్షకులను వారి కుక్కలతో సహా బదిలీ చేసింది. 23వ బెటాలియన్ డాగ్ స్క్వాడ్కు చెందిన ట్రాకర్, స్నిఫ్ఫర్, నార్కో కుక్కలతో పాటు వాటి శిక్షకులను వివిధ జిల్లాలకు పంపింది. వారు తక్షణమే విధుల్లో చేరాలని ఆదేశించింది.
సీఎం నివాసానికి కుక్కల తరలింపు..
తాజా బదిలీల్లో చింద్వారా, సత్నా, బెతుల్ నుంచి మూడు స్నిఫ్ఫర్ కుక్కలను భోపాల్లోని ముఖ్యమంత్రి నివాసానికి తరలించారు. ఈ అంశాన్ని ప్రధాన రాజకీయ అస్త్రంగా మార్చుకున్న భాజపా... కమల్నాథ్ ప్రభుత్వంపై విమర్శలు గుప్పించింది.
"ఘనత వహించిన కమల్నాథ్ ప్రభుత్వం ఆఖరికి కుక్కలనూ వదిలిపెట్టకుండా బదిలీలు చేస్తోంది."
- విజేశ్ లూనావత్, మధ్యప్రదేశ్ రాష్ట్ర భాజపా ఉపాధ్యక్షుడు
భూమిని, ఆకాశాన్నీ అమ్మేస్తారు...
డాగ్ స్క్వాడ్ బదిలీ వ్యవహారంపై స్పందించిన భాజపా ఎమ్మెల్యే రామేశ్వర్ శర్మ... ' కొనేవారు ఉంటే... కాంగ్రెస్ ప్రభుత్వం భూమిని, ఆకాశాన్నీ అమ్మేస్తుంది' అని ఎద్దేవా చేశారు.
సర్పంచ్ బదిలీ..
శుక్రవారం మధ్యప్రదేశ్ ప్రభుత్వం... ఓ పంచాయతీ సర్పంచ్ను బదిలీ చేస్తూ ఉత్తర్వులు ఇచ్చింది. నిజానికి పంచాయతీ కార్యదర్శిని బదిలీ చేయబోయి పొరపాటున సర్పంచ్ పేరును బదిలీ ఉత్తర్వులో పేర్కొంది. ఈ వ్యవహారమూ రాజకీయ రగడకు దారితీసింది.
ఇదీ చూడండి: బేటీ బచావోపై లోగోతో విద్యార్థుల రికార్డు
