ఈ రోజు రాత్రి 7 గంటలకు భారత ప్రధానమంత్రిగా వరుసగా రెండోసారి ప్రమాణ స్వీకారం చేయనున్నారు నరేంద్ర మోదీ. ఘనంగా జరగనున్న ఈ వేడుకకు వివిధ రంగాల ప్రముఖులకు ఆహ్వానాలు అందాయి. వీరిలో సీనీ, క్రీడా, వ్యాపార రంగాలకు చెందిన ముఖ్యులున్నారు.
రజనీ, షారుక్...
సినీరంగం నుంచి సూపర్స్టార్ రజనీకాంత్, బాలీవుడ్ అగ్రనటుడు షారుక్ ఖాన్, కంగనా రనౌత్, కరణ్ జోహార్, సంజయ్ లీలా భన్సాలీలకు ఆహ్వానం అందింది.
ద్రవిడ్, భజ్జీ...
క్రీడారంగం నుంచి ఆహ్వానం అందిన ప్రముఖుల్లో మాజీ క్రికెటర్లు రాహుల్ ద్రవిడ్, అనిల్ కుంబ్లే, జవగల్ శ్రీనాథ్, హర్బజన్ సింగ్ ఉన్నారు.
భారత బ్యాడ్మింటన్ అగ్రశ్రేణి క్రీడాకారిణి సైనా నెహ్వాల్, కోచ్ పుల్లెల గోపీచంద్, జిమ్నాస్ట్ దీపా కర్మాకర్లతో పాటు ఒకప్పటి పరుగుల రాణి పి.టి ఉషలు కార్యక్రమానికి హాజరుకానున్నారు.
అంబానీ, అదానీ, రతన్ టాటా
మోదీ ప్రమాణ స్వీకార కార్యక్రమంలో పాల్గొనేందుకు దేశంలోని బడా వ్యాపారవేత్తలు ముకేశ్ అంబానీ, గౌతమ్ అదానీ, రతన్ టాటాలతో పాటు అజయ్ పిరమాల్, జాన్ చాంబర్స్, బిల్ గేట్స్లకు ఆహ్వానం పంపారు.
అంతర్జాతీయ ద్రవ్యనిధి(ఐఎంఎప్) ఎండీ, ఛైర్మన్ క్రిస్టైన్ లగార్డీకి ఆహ్వానం లభించింది.
దేశవిదేశాల నుంచి మొత్తం 8 వేల మంది అతిథులకు మోదీ ప్రమాణ స్వీకార కార్యక్రమానికి ఆహ్వానం అందింది. వీరిలో ఇతర రాష్ట్రాల సీఎంలు, ప్రతిపక్షాల నేతలు సహా ప్రపంచ దేశాధినేతలూ ఉన్నారు. దాదాపు 6 వేల మంది అతిథులు హజరయ్యే అవకాశముందని అధికారులు అంచనా వేస్తున్నారు.
10 వేల మంద్రి భద్రతా సిబ్బంది...
దిల్లీలోని రాష్ట్రపతి భవన్ ఎదుట జరిగే మోదీ ప్రమాణ స్వీకార మహోత్సవానికి బహుళ అంచెల భద్రతతో పటిష్ఠ బందోబస్తు ఏర్పాటు చేశారు అధికారులు. 10 వేల మందికిపైగా భద్రతా సిబ్బందిని మోహరించారు. మోదీ సందర్శించబోయే రాజ్ఘాట్, సదైవ్ అటల్ సమాధి, జాతీయ యుద్ధ స్మారకం వంటి కీలక ప్రాంతాల్లో ప్రత్యేక బృందాలను నియమించారు.
ఇదీ చూడండి: కేంద్ర హోంమంత్రిగా అమిత్షా..!
