దేశవ్యాప్తంగా లాక్డౌన్ అమల్లో ఉన్న నేపథ్యంలో ప్రధానమంత్రి నరేంద్రమోదీ ఎప్పటికప్పుడు ప్రజలకు సూచనలు చేస్తున్నారు. కరోనా వైరస్ను ఎదుర్కొనేందుకు పాటించాల్సిన అంశాలను తెలియజేస్తున్నారు. ఈ నేపథ్యంలో ఈరోజు ఉదయం 9 గంటలకు ఓ చిన్న వీడియో సందేశాన్ని.. దేశ ప్రజలతో పంచుకోనున్నట్లు తన ట్విట్టర్లో వెల్లడించారు.
కరోనా వైరస్పై పోరులో భాగంగా గురువారం.. అన్ని రాష్ట్రాల ముఖ్యమంత్రులతో ప్రధాని వీడియో కాన్ఫరెన్స్లో మాట్లాడారు. రాష్ట్రాలు తీసుకుంటున్న చర్యలు, తీసుకోవాల్సిన జాగ్రత్తలపై చర్చించారు.
దేశంలో కరోనా కేసుల సంఖ్య 2వేలు దాటింది. కరోనా బారిన పడి మృతిచెందిన వారి సంఖ్య కూడా 50 దాటినట్టు కేంద్ర ఆరోగ్య మంత్రిత్వ శాఖ వెల్లడించింది.
మోదీ ఫోన్ సంభాషణ..
బ్రిటన్లో వైరస్ విజృంభిస్తున్న తరుణంలో.. ఆ దేశ యువరాజు చార్లెస్తో ఫోన్లో సంభాషించారు ప్రధాని మోదీ. బ్రిటన్లోని తాజా పరిస్థితులను అడిగి తెలుసుకున్నారు. వైరస్ కారణంగా బ్రిటన్లో ప్రాణాలు కోల్పోయిన వారి కుటుంబ సభ్యులకు సానుభూతి తెలిపారు.
మరోవైపు కరోనా బాధితుల చికిత్సకు అవసరమైన వైద్య పరికరాలు, మందుల అంశంపై జర్మనీ ఛాన్స్లర్ ఏంజెలా మెర్కెల్తో ఫోన్లో సంభాషించారు మోదీ. ఇరు దేశాలకు ఎగుమతి, దిగుమతుల మార్గాలపై మెర్కెల్తో చర్చించారు.
అన్ని రాష్ట్రాల ప్రభుత్వ అధికారులతో..
రాష్ట్రపతి రామ్నాథ్ కోవింద్, ఉపరాష్ట్రపతి వెంకయ్యనాయుడు.. వీడియో కాన్ఫరెన్స్ ద్వారా ప్రభుత్వ అధికారులతో నేడు సమావేశం కానున్నారు. అన్ని రాష్ట్ర, కేంద్ర పాలిత ప్రాంతాల గవర్నర్లు, లెఫ్టినెంట్ గవర్నర్లు, యంత్రాంగాలతో చర్చలు జరుపుతారు. కరోనాపై ఆయా రాష్ట్రాల్లోని ప్రస్తుత పరిస్థితులపై చర్చించడం ఈ భేటీ ముఖ్య అజెండా. మార్చి 27న దిల్లీ లెఫ్టినెంట్ గవర్నర్తో సహా మరో 14 రాష్ట్రాల గవర్నర్లతో ఇదే విధంగా చర్చలు జరిపారు.
ఇదీ చూడండి : దిల్లీలో ఒక్కరోజే 141 కొత్త కేసులు- 2 మరణాలు
