ఇటీవల ప్రకటించిన న్యాయ్ (ఎన్వైఏవై) కనీస ఆదాయ భరోసా పథకంలో భాగంగా దేశంలోని ఐదు కోట్ల నిరుపేద కుటుంబాలకు ఏడాదికి రూ.72 వేలు ఇస్తామని తెలిపారు. పేదరికం నుంచి వారిని బయటపడేయటానికి ఇది ఎంతో ఉపయోగపడుతుందన్నారు.
ఓబీసీలకు కాంగ్రెస్ పార్టీలో సముచిత స్థానం కల్పిస్తామని భరోసానిచ్చారు రాహుల్.
"కాంగ్రెస్ పార్టీ కనీస ఆదాయం పథకం(న్యాయ్) గురించి మాట్లాడటం ప్రారంభించాక ప్రధాని మోదీ ముఖ కవలికలు మారిపోయాయి. భయం కనిపిస్తోంది. మోదీ అధికారం నుంచి వైదొలిగేందుకు సిద్ధంగా ఉన్న వ్యక్తి. ఆయనకు దిగిపోయే సమయం వచ్చింది. కాంగ్రెస్ పార్టీ అధికారంలోకి వచ్చే సమయం వచ్చింది. రానున్న రోజుల్లో మీకు కాంగ్రెస్ పార్టీలో స్థానం ఉంటుంది. ప్రస్తుతం కాంగ్రెస్ పార్టీలో ఇద్దరు ఓబీసీ ముఖ్యమంత్రులు ఉన్నారు. రానున్న రోజుల్లో మరింత మంది ఓబీసీ ముఖ్యమంత్రులు, ఎంపీలు, ఎమ్మెల్యేలు వస్తారు. నేను భరోసా ఇస్తున్నా. నరేంద్ర మోదీలా నేను అబద్ధాలు చెప్పను. ఓబీసీలకు, పేదలకు, ఆదివాసీలకు, రైతులకు కాంగ్రెస్లో స్థానం ఉంటుంది. దేశంలోని యువత వ్యాపారం చేసుకోవటానికి మేకిన్ ఇండియాలో భాగంగా మూడేళ్ల వరకు ఎలాంటి అనుమతులు తీసుకోవాల్సిన అవసరం లేకుండా చేస్తాం. "
-రాహుల్ గాంధీ, కాంగ్రెస్ అధ్యక్షుడు
ప్రజలకు రూ.15 లక్షలు ఇస్తామని2014 ఎన్నికల్లో హామీ ఇచ్చి..మోదీ మోసం చేశారని రాహుల్ విమర్శించారు. కాంగ్రెస్ పార్టీ అధికారంలోకి వస్తే కనీస ఆదాయ పథకంలో భాగంగా ఒక్కో పేద కుటుంబానికి రూ.72 వేలు కచ్చితంగా ఇస్తుందని పునరుద్ఘాటించారు. కాంగ్రెస్ పార్టీ ప్రజలకు పని కల్పించటంపై మాట్లాడుతుందే తప్ప మనసులో మాట గురించి కాదని ప్రధాని రేడియో కార్యక్రమంపై వ్యంగ్యాస్త్రాలు సంధించారు రాహుల్.
మోదీ ప్రభుత్వ మేకిన్ ఇండియా పథకంపైనా విమర్శలు చేశారు రాహుల్. ప్రజలకు మేకిన్ ఇండియా కావాలి... కానీ దాన్ని అంబానీ తయారు చేయాల్సిన అవసరం లేదన్నారు.
