కాంగ్రెస్ తప్పిదాల వల్ల జమ్ముకశ్మీర్ ప్రజలకు అన్యాయం జరిగిందని ఆరోపించారు ప్రధాని మోదీ. గత ప్రభుత్వాల తప్పిదం వల్లే పాక్ ఆక్రమిత కశ్మీర్ ఏర్పడిందని విమర్శించారు మోదీ. కొన్ని కుటుంబాల లబ్ధి కోసం కశ్మీర్ ప్రజల అభివృద్ధిని పక్కనపెట్టారన్నారు ప్రధాని.
హరియాణాలోని సిర్సాలో నిర్వహించిన ఎన్నికల ప్రచారంలో పాల్గొన్నారు ప్రధాని. ఆర్టికల్ 370 తాత్కాలికమే అయినా.. కాంగ్రెస్ ప్రభుత్వం దాన్ని ఏమీ చేయలేకపోయిందని పేర్కొన్నారు. ప్రధాని బాధ్యతలు అప్పగించి తనను శాశ్వతం చేసిన ప్రజలకు.. ఇలాంటి తాత్కాలిక పద్ధతులను ఎలా ఉంచగలనని ఉద్ఘాటించారు ప్రధాని.
"దిల్లీలో ప్రభుత్వం పడుకోవడం వల్ల కశ్మీర్ పరిస్థితి దయనీయంగా మారింది. ప్రారంభ దశల్లో పాకిస్థాన్ మద్దతుతో మనలోని కొంత భాగాన్ని దొంగిలించారు. అది పీఓకేగా మారింది. భారత్ దేన్ని చూసి గర్వపడుతుందో, ప్రపంచాన్ని సరైన మార్గంలో నడిపించేందుకు ఉపయోగపడిందో, జమ్ముకశ్మీర్ దేనికైతే ప్రతీకగా నిలిచేదో.. ఆ సూఫీ సంప్రదాయాన్ని కొన్నేళ్ల తర్వాత హతమార్చారు. సూఫీ ఆలోచనలను నాశనం చేశారు. సూఫీ సంప్రదాయాన్ని చంపి కశ్మీర్ను దెబ్బతీశారు. మెల్లమెల్లగా ఈ దుస్థితి ఇంకా ముందుకు సాగింది. ఇంత పెద్ద అన్యాయం జరుగుతున్నా.. దిల్లీలో కూర్చున్న పెద్దలకు కనపడలేదు."
--- నరేంద్ర మోదీ, ప్రధానమంత్రి.
కర్తార్పుర్ నడవా నిర్మాణం ఎన్డీఏ ప్రభుత్వ హయాంలో జరగడం ఎంతో గౌరవంగా ఉందన్నారు ప్రధానమంత్రి నరేంద్ర మోదీ. సిక్కు గురువు గురు నానక్ పవిత్ర స్థలాన్ని 70ఏళ్లుగా దూరం నుంచి బైనాక్యులర్లతో చూసే దుస్థితి నుంచి ఎట్టకేలకు విముక్తి లభించిందన్నారు మోదీ. దేశ విభజన సమయంలో కర్తార్పుర్ సాహెబ్ గురుద్వారా భారత్కు దక్కకపోవడానికి కాంగ్రెస్ బాధ్యత వహించాలన్నారు.
