స్టన్నింగ్ లుక్​లో హోండా ఎలివేట్ బ్లాక్ ఎడిషన్ వచ్చేసిందోచ్!- ధర ఎంతంటే?

దేశీయ మార్కెట్లో హోండా ఎలివేట్ బ్లాక్ ఎడిషన్ లాంఛ్- ధర, ఫీచర్ల వివరాలు మీకోసమే!- ఓ లుక్కేయండి మరి!

Elevate Black Edition Launched: జపనీస్ కార్ల తయారీ సంస్థ హోండా కార్స్ దేశీయ మార్కెట్లో దాని మిడ్-సైజ్ SUV హోండా ఎలివేట్ బ్లాక్ వెర్షన్‌ను ప్రారంభించింది. కంపెనీ ఈ ప్రత్యేక ఎడిషన్‌ను రూ. 15.51 లక్షల (ఎక్స్-షోరూమ్) ప్రారంభ ధరతో తీసుకొచ్చింది. దీంతోపాటు హోండా ఎలివేట్ సిగ్నేచర్ బ్లాక్ ఎడిషన్‌ను కూడా ప్రవేశపెట్టింది. మార్కెట్లో దీని ప్రారంభ ధర రూ. 15.71 లక్షల (ఎక్స్-షోరూమ్).

ఈ ప్రత్యేక ఎడిషన్లన్నీ కారు టాప్-స్పెక్ ZX ట్రిమ్ ఆధారంగా రూపొందించారు. వీటిలో మాన్యువల్, CVT ఆటోమేటిక్ గేర్‌బాక్స్ ఆప్షన్లు ఉన్నాయి. మార్కెట్లో వీటి సేల్స్ ఇప్పటికే ప్రారంభమయ్యాయి. వీటితోపాటు గతేడాది లాంఛైన హోండా ఎలివేట్ అపెక్స్ ఎడిషన్​ కూడా మార్కెట్లో అమ్మకానికి అందుబాటులో ఉంటుంది.

హోండా ఎలివేట్ బ్లాక్ ఎడిషన్ ఫీచర్లు: హోండా ఎలివేట్ బ్లాక్ ఎడిషన్ పూర్తిగా నల్లటి ఇంటీరియర్, అల్లాయ్ వీల్స్​తో పాటు క్రిస్టల్ బ్లాక్ పెర్ల్ పెయింట్ షేడ్ ఎక్స్​టీరియర్​ను కలిగి ఉంటుంది. దీని డోర్స్ కింది భాగం, అప్పర్ గ్రిల్, రూఫ్​ రైల్స్​పై సిల్వర్ ఫినిషింగ్ ఉంటుంది.

ఎలివేట్ సిగ్నేచర్ బ్లాక్ ఎడిషన్ మాన్యువల్ వేరియంట్ ధర రూ. 15.71 లక్షలు. ఇక దీని CVT వేరియంట్ ధర రూ. 16.93 లక్షలు (ఎక్స్-షోరూమ్). ఈ ఎలివేట్ బ్లాక్ ఎడిషన్ ఒక అడుగు ముందుకు వేసి అన్ని సిల్వర్ భాగాలపై బ్లాక్​ ఫినిష్​తో వస్తుంది. ఇది ఏడు రంగుల యాంబియంట్ ఇంటీరియర్ లైటింగ్‌ను కలిగి ఉంది.

స్టాండర్డ్ ఎలివేట్ SUV మాదిరిగానే ఇందులో ఆరు ఎయిర్‌బ్యాగులు, 10.25-అంగుళాల ఇన్ఫోటైన్‌మెంట్ స్క్రీన్, లెథరెట్ సీట్లు, సింగిల్-పేన్ సన్‌రూఫ్, కెమెరా-బేస్డ్ ADAS, ఆటో హెడ్‌లైట్స్ అండ్ వైపర్స్, సెమీ-అనలాగ్ ఇన్స్ట్రుమెంట్ క్లస్టర్, 7.0-అంగుళాల TFT డిస్​ప్లే వంటివి ఉన్నాయి.

హోండా ఎలివేట్ బ్లాక్ ఎడిషన్ పవర్‌ట్రెయిన్: కంపెనీ దీని ఇంజిన్‌లో ఎటువంటి మార్పులు చేయలేదు. ఇది ఇప్పటికే ఉన్న హోండా ఎలివేట్‌లో కనిపించే 1.5-లీటర్, సహజంగా ఆశించిన పెట్రోల్ ఇంజిన్‌ను కలిగి ఉంది. ఈ ఇంజిన్ 120bhp పవర్​ని ప్రొడ్యూస్ చేస్తుంది. ఇది మాన్యువల్, CVT ఆటోమేటిక్ గేర్‌బాక్స్‌తో వస్తుంది.

హోండా ఎలివేట్ బ్లాక్ ఎడిషన్ ప్రత్యర్థులు: హోండా ఎలివేట్ బ్లాక్ ఎడిషన్ ఇండియన్ మార్కెట్లో హ్యూందాయ్ క్రెటా నైట్ ఎడిషన్, MG ఆస్టర్ బ్లాక్ స్టార్మ్, మారుతి సుజుకి గ్రాండ్ బ్లాక్ ఎడిషన్‌లతో పోటీపడుతుంది. ఇక స్టాండర్డ్ హోండా ఎలివేట్ దేశీయ మార్కెట్లో క్రెటా, సెల్టోస్, గ్రాండ్ విటారా, హైరైడర్, కుషాక్, టైగన్ వంటి SUV లతో పోటీపడుతుంది. హ్యుందాయ్ మిడ్-సైజ్ SUV నెలకు సగటున 15 వేల యూనిట్ల సేల్స్​తో ఈ సెగ్మెంట్​లో అగ్రగామిగా ఉంది.