పాలక్యాన్లలో మద్యం సీసాలు.. దిల్లీలో వ్యాపారి నిర్వాకం

లాక్​డౌన్​ నేపథ్యంలో దేశవ్యాప్తంగా కఠిన ఆంక్షలు అమల్లో ఉన్నాయి. నిత్యావసర వస్తువులు మినహా వేటినీ అనుమతించడం లేదు. దీనినే ఆసరాగా చేసుకున్న ఓ పాలవ్యాపారి, తన పాలక్యాన్​లలో ఏకంగా మద్యాన్ని తరలిస్తూ.. పోలీసులకు అడ్డంగా దొరికిపోయాడు.

కరోనా కట్టడి చర్యల్లో భాగంగా దేశవ్యాప్తంగా లాక్​డౌన్​ అమల్లో ఉంది. నిత్యావసర వస్తువుల దుకాణాలు తప్పా.. మిగతా షాపులన్నీ మూతపడ్డాయి. అయితే, కొంతమంది ఈ నిత్యావసర వస్తువుల ముసుగులో తప్పుడు పనులు చేస్తున్నారు. దిల్లీలో ఇలాగే ఓ పాలవ్యాపారి.. తన పాలక్యాన్​లలో అక్రమంగా మద్యం తీసుకెళ్తూ అడ్డంగా బుక్కయ్యాడు. ప్రస్తుతం జైల్లో ఊచలు లెక్కపెడుతున్నాడు.

ఇదీ జరిగింది..

బులంద్​శహర్​కు చెందిన బాబీ.. తన ద్విచక్రవాహనంపై పాల్​క్యాన్​లు తీసుకెళ్తూ సౌత్​ ఎవెన్యూ రోడ్​ చెక్​పోస్ట్​​ వద్ద పోలీసుల కంటపడ్డాడు. కానీ.. అతను బైక్​ ఆపకుండా ముందుకు వెళ్లినందున అర్ధరాత్రి సమయంలో పాలు తీసుకెళ్లడమేంటనే అనుమానంతో వెంబడించారు. ఎట్టకేలకు రాష్ట్రపతి భవన్​- నాలుగో నంబర్​ గేట్​ వద్ద పోలీసులకు చిక్కాడు.

పాల క్యాన్ ఓపెన్ చేసి చూస్తే అందులో 7 మద్యం బాటిళ్లు ఉన్నాయి. ఒక్కసారిగా ఆశ్చర్యపోయారు పోలీసులు. అనంతరం వాటిని సీజ్​ చేసి.. అంటువ్యాధుల చట్టం, దిల్లీ అబ్కారీ చట్టం, మోటార్ వాహనాల చట్టం, ఐపీసీ సెక్షన్ల​ కింద కేసు నమోదు చేసి అరెస్టు చేశారు.

ఇదీ చదవండి: నోట్ల రద్దు తరహాలోనే లాక్​డౌన్​ విఫలమైంది: కమల్​