మాథ్యూస్ అబ్రహం ఇంట్లో నుంచి రెండు బైబిళ్లు తీసుకొస్తే.. వాటిల్లో తేడాలు కనిపెట్టడం కష్టమే! ఒకటి ముద్రించినది, రెండోది ఆయన స్వయంగా చేతితో రాసింది. అయినా ఆ గ్రంథాలు ఒకేలా ఉంటాయి. ఎందుకంటే 66 ఏళ్ల వయసులోనూ ఆయన బైబిల్ను అచ్చుగుద్దినట్లు చేతితో రాస్తున్నారు. అంతేకాదు ఆ పవిత్ర గ్రంథంలోని పటాలనూ చక్కగా గీసేస్తున్నారు. ఇందుకు ఏకంగా నాలుగేళ్లు శ్రమించారు.
కొట్టారక్కరలోని త్రికన్నమంగళ్కు చెందిన విశ్రాంత ఎకనామిక్స్ ప్రొఫెసర్ మాథ్యూస్ అబ్రహం. పదవీ విరమణ తర్వాత మొత్తం బైబిల్ను చేత్తో రాయాలనే ఆలోచన వచ్చింది. వెంటనే రాయటం మొదలుపెట్టారు. అయితే రాతపై పట్టు సంపాదించిన ఆయన.. ప్రస్తుతం ప్రింటెడ్ వెర్షన్ను పోలినంతగా తన అక్షర శైలిని మార్చుకున్నారు. బెంగళూరు బైబిల్ సొసైటీ ప్రచురించిన 266 పేజీల కొత్త నిబంధన, 902 పేజీల పాత నిబంధన బైబిల్ను అచ్చుగుద్దినట్లు రాయడమే కాకుండా వాటిల్లోని మ్యాప్లనూ యథావిధిగా గీసేశారు.
జర్మనీ పెన్నులతో
ఈ బైబిల్ రాయడానికి మాథ్యూస్ జర్మనీ నుంచి తెచ్చిన ఫౌంటన్ ఇంక్ పెన్నులను ఉపయోగించారు. అంతేకాకుండా బైబిల్లో ఓ అక్షరం ఎక్కడ ముగుస్తుందో మాథ్యూస్ రాసినది అలానే ఉంటుంది. ఈయన రాసిన బైబిల్ కాపీలో.. రెండు నిలువు వరుసలు, 52 లైన్లలో వాక్యాలు కూర్చారు. ఫలితంగా మాతృకను పోలినట్లే అదనపు పేజీ, అదనపు స్థలం పుస్తకంపై కనిపించదంటే ఆశ్చర్యమే కదా. 28 ఏళ్లు కాలేజీ ప్రొఫెసర్గా పనిచేసిన మాథ్యూస్.. ఇప్పుడు అన్ని మత గ్రంథాలను చేతితో రాయాలని ప్రయత్నిస్తున్నారు.
ఇదీ చదవండి: 'పరీక్షల సంఖ్య పెరిగితేనే కరోనా కట్టడి సాధ్యం'
