సంక్షోభాల సాగు: అన్నదాతకు పెళ్లి కష్టాలు

వ్యవసాయంలోనే సాయం ఉంది. కానీ రైతులకు సాయం చేసేందుకు ఎవరూ ముందుకు రారు. రాజకీయ నాయకుల నుంచి సాధారణ ఉద్యోగి వరకు అన్నదాతలంటే అందరికీ చిన్నచూపే. ఇప్పుడు ఆ జాబితాలో అమ్మాయిలూ చేరారు.

అన్నదాతలు... వర్షం కోసం ఆశగా ఎదురు చూడటం నుంచి పండించిన పంటను అమ్ముకోవడం వరకు అన్నీ కష్టాలే. దేశంలోని ఏ మారుమూల ప్రాంతం చూసినా రైతుల ఆవేదనే కనపడుతుంది. వీటిని తట్టుకోలేక కొంతమంది వలసపోతే, మరి కొందరు ఆత్మహత్యలకు పాల్పడుతుంటారు. మహారాష్ట్ర లాతూర్​ జిల్లా రైతులకు ఈ కష్టాలకు మరో సమస్య తోడైంది.

లాతూర్​లో అన్నదాతలను అమ్మాయిలూ చిన్నచూపు చూస్తున్నారు. వారిని పెళ్లి చేసుకోవడానికి ఎవరూ ముందుకు రావట్లేదు. ఆ జిల్లాలో దాదాపు 80-90 మంది యువ రైతుల పరిస్థితి ఇంతే. తమ ఆశలు నెరవేర్చగలిగే స్తోమత రైతులకు ఉండదని, అందుకే వారిని వివాహం చేసుకోలేమని యువతులు తేల్చి చెబుతున్నారు. సాఫ్ట్​వేర్,​ ప్రభుత్వ ఉద్యోగాలు చేసే యువకులనే వారు ఇష్టపడుతున్నారు.

"వర్షాభారంతో రైతులు సంక్షోభంలో కూరుకుపోయారు. రైతుల వద్ద డబ్బులు లేవు. అందుకే యువతులు అన్నదాతలను పెళ్లి చేసుకోవడానికి ఇష్టపడటం లేదు. నేను 9 పెళ్లి చూపులకు వెళ్లాను. ఒక్కరూ నన్ను పెళ్లి చేసుకోవడానికి ముందుకు రాలేదు. వ్యవసాయం వదులుకుంటేనే పెళ్లి చేసుకుంటామన్నారు."
- రైతు, లాతూర్​ జిల్లా

పంటలు పండిస్తుంటే పెళ్లిళ్లు అవ్వవని, పట్టణాలకు వలస వెళ్లి ఇతర ఉద్యోగాలు చూసుకోవాలని పెద్దలు సలహాలిస్తున్నారు. సంబంధాలు కుదరక, కడుపు నింపే వ్యవసాయాన్ని వదలలేక యువ రైతులు మనోవేదనకు గురవుతున్నారు.