ఉత్తర్ప్రదేశ్ లఖీంపుర్ ఖేరీలో ముడేళ్ల చిన్నారిని అత్యాచారం చేసి ఆపై ఘోరంగా హత్య చేసిన కేసును పోలీసులు చేధించారు. పోలీసులు నాలుగు బృందాలను ఏర్పాటు చేసి గంటల వ్యవధిలోనే నిందితుడ్ని అరెస్ట్ చేశారు. ఈ క్రమంలో స్వల్ప కాల్పులు చోటుచేసుకోగా నిందితుడు లేఖ్రామ్ కాలిలో బుల్లెట్ దిగింది. దీంతో సమీప ఆసుపత్రిలో చేర్పించి చికిత్స అందిస్తున్నారు.
నిందితుడి ఆరోగ్యం నిలకడగా ఉందని, ప్రమాదమేమీ లేదని వైద్యులు వెల్లడించారు. అవసరమైతే అతనిపై జాతీయ భద్రతా చట్టం కింద కేసు నమోదు చేస్తామని ఉత్తర్ప్రదేశ్ పోలీసులు వెల్లడించారు.
ఇదీ జరిగింది...
లఖీంపుర్ ఖేరీలో మూడేళ్ల చిన్నారి బుధవారం కనిపించకుండా పోయింది. మరుసటి రోజు ఇంటికి సమీపంలోని చెరకు తోటలో శవమై కనిపించింది. శవపరీక్ష నిర్వహించిన వైద్యులు అత్యాచారం జరిగినట్లు నిర్ధరించారు. పాత కక్షల కారణంగా తన పక్క గ్రామానికి చెందిన వ్యక్తే ఈ దుర్మార్గానికి పాల్పడ్డాడని చిన్నారి తండ్రి ఆరోపించాడు. పోలీసులు ఈ కోణంలో దర్యాప్తు చేసి గంటల వ్యవధిలోనే నిందితుడ్ని పట్టుకున్నారు.
లఖీంపుర్ ఖేరీ జిల్లాలో 20 రోజుల వ్యవధిలో ఇది మైనర్లపై జరిగిన మూడో అత్యాచారం- హత్య ఘటన కావడం గమనార్హం.
