గత కొద్ది రోజులుగా బంగాల్లో జరుగుతున్న వైద్యుల ఆందోళనలకు తెరపడే అవకాశం కనిపిస్తోంది. జూనియర్ వైద్యుల డిమాండ్లకు అంగీకరించిన మమతా బెనర్జీ.. కోల్కతాలో వారితో సమావేశమయ్యారు. రాష్ట్రంలోని ప్రతి వైద్య కళాశాల నుంచి ఇద్దరు ప్రతినిధుల చొప్పున చర్చల్లో పాల్గొన్నారు. మీడియా తప్పనిసరిగా ఉండాలని షరతు విధించిన జూడాల డిమాండ్కు అంగీకరించింది ప్రభుత్వం.
బంగాల్లో వారం రోజులుగా ఆందోళనలు చేపడుతున్నారు వైద్య విద్యార్థులు. దాడికి గురైన వైద్యులకు సంఘీభావంగా దేశవ్యాప్తంగా డాక్టర్లు నిరసనలకు దిగారు. 2 రోజుల ముందే ముఖ్యమంత్రి మమతా బెనర్జీ.. రాష్ట్రంలోని జూడాల డిమాండ్లకు అంగీకరించి, చర్చలకు రావాలని ఆహ్వానించారు.
ఒకరోజు తర్వాత ప్రభుత్వంతో చర్చలకు సిద్ధమని.. వేదిక ఎక్కడో సీఎం నిశ్చయించాలని ప్రకటించారు జూనియర్ వైద్యులు. అనంతరం.. సచివాలయంలో చర్చలకు రావాలని పిలుపునిచ్చారు మమతా బెనర్జీ.
జరిగిందిదీ...
నీల్రతన్ సర్కార్ (ఎన్ఆర్ఎస్) వైద్య కళాశాల ఆసుపత్రిలో చనిపోయిన ఒక రోగి బంధువులు, గత సోమవారం రాత్రి ఇద్దరు వైద్యులపై దాడిచేసి, తీవ్రంగా గాయపరిచారు. మంగళవారం నుంచి బంగాల్ వ్యాప్తంగా జూనియర్ వైద్యులు ఆందోళన చేస్తున్నారు. ఫలితంగా రాష్ట్రంలో వైద్య వ్యవస్థ దాదాపు స్తంభించింది. వీరికి మద్దతుగా దేశవ్యాప్తంగా ఆందోళనలు మిన్నంటాయి.
