మహారాష్ట్ర అసెంబ్లీ ఎన్నికల పోరుకు రెండు రోజుల ముందు నాటకీయ పరిణామం చోటు చేసుకుంది. అక్రమ నగదు కలిగి ఉన్నారన్న ఆరోపణలతో నేషనలిస్ట్ కాంగ్రెస్ పార్టీ నాయకుడు, సోలాపుర్ జిల్లా మోహోల్ నియోజకవర్గ ఎమ్మెల్యే రమేశ్ కదమ్ అరెస్టయ్యారు. ఆయన వద్ద నుంచి రూ.53.46 లక్షలు స్వాధీనం చేసుకున్నారు ఈసీ అధికారులు.
ఠాణె జిల్లా ఘోద్బందర్లోని ఓ అపార్ట్మెంట్లో అక్రమ నగదు కలిగి ఉన్నారన్న సమాచారం మేరకు ఎన్నికల సంఘం, ఠాణె పోలీసులు ఆకస్మిక తనిఖీలు చేపట్టారు.
"ఎన్నికల సంఘం బృందంతో పాటు ఠాణె పోలీసులు ఈ ప్రాంతంలో తనిఖీలు చేపట్టారు. ఆ సమయంలో ఎమ్మెల్యే రమేశ్ కదమ్, ఫ్లాట్ యజమాని రాజు గ్యాను ఖేర్ ఉన్నట్లు గుర్తించారు. ఫ్లాట్లో రూ.53.46 లక్షల రూపాయలు లభించాయి. ఫ్లాట్ను సీజ్ చేశాం"
- దిలిప్ శిందే, అదనపు ముఖ్య ఎన్నికల అధికారి మహారాష్ట్ర.
ప్రస్తుతం జరుగుతున్న అసెంబ్లీ ఎన్నికల్లో మోహోల్ నుంచి స్వతంత్ర అభ్యర్థిగా పోటీ పడుతున్నారు రమేశ్. స్వాధీనం చేసుకున్న నగదుపై ఆదాయపన్ను శాఖకు సమాచారం అందించి.. ఘటనపై దర్యాప్తు చేపట్టింది ఎన్నికల సంఘం.
288 స్థానాలున్న మహారాష్ట్ర శాసనసభకు ఈనెల 21న ఎన్నికలు జరగనున్నాయి. 24న ఫలితాలు వెలువడనున్నాయి.
ఇదీ చూడండి: 'గోయల్... విజయ గర్వంతో మాట్లాడొద్దు': కాంగ్రెస్
