జాతీయ దర్యాప్తు సంస్థ(ఎన్ఐఏ) చట్ట సవరణ బిల్లు-2019... లోక్సభలో ఆమోదం పొందింది. 278 మంది అనుకూలంగా ఓటేయగా.. ఆరుగురు మాత్రమే వ్యతిరేకించారు. బిల్లు ఆమోదంతో స్వదేశంతో పాటు ఇతర దేశాల్లోని భారతీయులపై ఉగ్రదాడుల దర్యాప్తునకు అనుమతి లభించినట్లయింది. సైబర్ నేరాలు, మానవ అక్రమ రవాణాపైనా దర్యాప్తు చేయడానికి ఈ సవరణలు అనుమతిస్తాయి.
బిల్లు ఆమోదానికి ముందు దిగువ సభలో సోమవారం పెద్ద చర్చే నడిచింది. కేంద్ర ప్రభుత్వం... దర్యాప్తు సంస్థలను రాజకీయ స్వలాభాల కోసం వినియోగిస్తుందని కొందరు ఎంపీలు ఆరోపించారు. ఇందుకు గట్టి సమాధానమిచ్చారు కేంద్ర హోంశాఖ మంత్రి అమిత్ షా.
మోదీ సర్కార్.. ఎన్ఐఏ చట్టాన్ని దుర్వినియోగం చేయదని లోక్సభలో స్పష్టం చేశారు షా.
''దీనిపై స్పష్టత ఇవ్వాలనుకుంటున్నా. మోదీ ప్రభుత్వానికి అలాంటి ఉద్దేశం ఏమీ లేదు. ఉగ్రవాదాన్ని తుదముట్టించడమే ప్రభుత్వ లక్ష్యం. మతంతో ఎలాంటి సంబంధం లేకుండా చర్యలు తీసుకుంటాం.''
- అమిత్ షా, కేంద్ర హోం శాఖ మంత్రి
ఉగ్రవాద వ్యతిరేక చట్టం-పోటాను రద్దుచేసిన కాంగ్రెస్ నేతృత్వంలోని యూపీఏ ప్రభుత్వంపై తీవ్ర విమర్శలు గుప్పించారు హోం మంత్రి. ఓటు బ్యాంకు కాపాడుకోవడానికే పోటాను రద్దు చేసింది కానీ..., చట్టం దుర్వినియోగం అవుతుందని కాదని ఆరోపించారు షా.
పోటా రద్దు తర్వాత ఉగ్రదాడులు పెరిగినందునే 2008 ముంబయి మారణహోమం అనంతరం.. యూపీఏ ప్రభుత్వమే ఎన్ఐఏ చట్టాన్ని తీసుకొచ్చిందని సభలో గుర్తు చేశారు.
