బిహార్ ఎన్నికలు దగ్గరపడుతున్న క్రమంలో గెలుపే లక్ష్యంగా తమ వ్యూహాలకు పదునుపెడుతున్నాయి పార్టీలు. ఈ క్రమంలోనే ఓటర్లను ఆకర్షించేందుకు పలు హామీలతో కూడిన మేనిఫెస్టోను బుధవారం విడుదల చేశాయి కాంగ్రెస్, లోక్జనశక్తి పార్టీ (ఎల్జేపీ).
పట్నాలో జరిగిన కార్యక్రమంలో ఎన్నికల ప్రణాళికను విడుదల చేశారు ఎల్జేపీ అగ్రనేత చిరాగ్ పాసవాన్. ఈ సందర్భంగా ముఖ్యమంత్రి నితీశ్ కుమార్పై విమర్శలు గుప్పించారు.
" బిహార్ ఫస్ట్ అనే మా విజన్ను ముందుకు తీసుకెళ్లే లక్ష్యంతో అసెంబ్లీ ఎన్నికల మేనిఫెస్టోను విడుదల చేశాం. దాని ద్వారా బిహార్ ప్రజలు ఎదుర్కొంటున్న చాలా సమస్యలకు పరిష్కారం లభిస్తుంది. మతతత్వాన్ని ప్రోత్సహించే వ్యక్తి నాయకత్వంలో బిహార్ అభివృద్ధిని ఊహించలేం. ఒకవేళ ఏదైనా జరిగి ప్రస్తుత ముఖ్యమంత్రి గెలిస్తే మన రాష్ట్రం తీవ్రంగా నష్టపోతుంది. మళ్లీ వినాశనపు అంచులకు చేరుతుంది."
- చిరాగ్ పాసవాన్, ఎల్జేపీ అగ్రనేత
అమ్మ ఆశీర్వాదం
మేనిఫెస్టో విడుదల కోసం పార్టీ కార్యాలయానికి వెళ్లే ముందు తన తల్లి ఆశీర్వాదం తీసుకున్నారు చిరాగ్ పాసవాన్. మేనిఫెస్టో పుస్తకాన్ని అందించారు. ఈ సందర్భంగా ఎన్నికల్లో అఖండ విజయం సాధించాలని సింధూర తిలకం దిద్ది ఆశీర్వదించారు పాసవాన్ తల్లి.
కాంగ్రెస్ మేనిఫెస్టో..
బిహార్ ఎన్నికల కోసం 'బద్లావ్ పత్ర-2020' పేరుతో మేనిఫెస్టోను విడుదల చేసింది కాంగ్రెస్. ఇందులో పార్టీ అధికార ప్రతినిధి రణ్దీప్ సింగ్ సుర్జేవాలా, రాజ్బబ్బర్ సహా పలువురు కీలక నేతలు పాల్గొన్నారు. 'మా ప్రత్యర్థులు రుణాలు, విద్యుత్తు బిల్లుల మాఫీ, సాగు సౌకర్యాల పెంపు వంటి వాటిపై మాట్లాడుతున్నారు. మా ప్రభుత్వం అధికారంలోకి వస్తే.. పంజాబ్లో చేసిన మాదిరిగా ప్రత్యేక వ్యవసాయ బిల్లులను తీసుకొచ్చి ఎన్డీఏ ప్రభుత్వం తెచ్చిన వ్యవసాయ సంస్కరణ చట్టాలను అడ్డుకుంటాం' అని పేర్కొన్నారు కాంగ్రెస్ నేత శక్తిసిన్హ్ గోహిల్.
మేనిఫెస్టోలోని కీలక అంశాలు..
- 10 లక్షల ప్రభుత్వ ఉద్యోగాల కల్పన
- వ్యవసాయ రుణాల మాఫీ
- నెలకు రూ.1500 నిరుద్యోగ భృతి
- వ్యవసాయ విద్యుత్తు బిల్లుల్లో 50 శాతం రాయితీ
- నూతన వ్యవసాయ చట్టాలను అడ్డుకునేలా బిల్లులు తీసుకురావటం
ఇదీ చూడండి: ఎన్నికల ప్రచార సభలో ప్రతిపక్ష నేతపైకి చెప్పులు
