లాక్డౌన్ 5.0లో ఆర్థిక కార్యకలాపాలకు పెద్దపీట వేస్తూ నూతన మార్గదర్శకాలను ఇప్పటికే విడుదల చేసింది కేంద్రం. త్రిశూల వ్యూహంతో పక్కా ప్రణాళికను ప్రజల ముందు ఉంచింది. అందుకు సంబంధించి మీకున్న ప్రశ్నలకు ఇవే సమాధానాలు...
- ఎప్పటి నుంచి ఎప్పటి వరకు?
సోమవారం నుంచి జూన్ 30 వరకు.
- హోటళ్లు తెరుచుకుంటాయా?
లాక్డౌన్ 4.0 వరకు మూతపడ్డ ప్రార్థనా మందిరాలు, హోటల్స్, రెస్టారెంట్స్, ఇతర ఆతిథ్య సేవలకు సంబంధించిన సంస్థలు, షాపింగ్ మాల్స్.. జూన్ 8న తెరుచుకుంటాయి. ఆయా ప్రదేశాల్లో పాటించాల్సిన నిబంధనలపై సంబంధిత శాఖలతో చర్చించి, త్వరలోనే మార్గదర్శకాలు జారీచేస్తుంది కేంద్ర ఆరోగ్య శాఖ.
- మరి అంతరాష్ట్ర రవాణా పరిస్థితి ఏంటీ?
అంతరాష్ట్ర రవాణాకు కూడా అనుమతులిచ్చింది కేంద్రం. ప్రత్యేక అనుమతులు, ఈ-పాస్ అవసరం లేదని తెలిపింది. అయితే.. కరోనా వ్యాప్తి తీవ్రత దృష్ట్యా రవాణాపై ఆంక్షలు విధించాలని ఏదైనా రాష్ట్ర ప్రభుత్వం భావిస్తే... కొత్త నిబంధనలపై విస్తృత ప్రచారం నిర్వహించి, తగిన చర్యలు చేపట్టాలని సూచించింది.
- పిల్లలు బడికి వెళ్లాలా?
విద్యాసంస్థలు ఇప్పట్లో తెరుచుకునే పరిస్థితులు కనపడటం లేదు. రాష్ట్రాలు, కేంద్ర పాలిత ప్రాంతాలతో చర్చించాకే పాఠశాలలు, కళాశాలలు, శిక్షణా సంస్థలు తెరవడంపై ఓ నిర్ణయం తీసుకోనున్నట్టు కేంద్రం వెల్లడించింది. విద్యా సంస్థలు తెరవడంపై విద్యార్థుల తల్లిదండ్రులు, ఇతర భాగస్వామ్యపక్షాలతో చర్చించాలని సూచించింది.
- వేటిపై నిషేధం కొనసాగుతుంది?
అంతర్జాతీయ విమాన ప్రయాణాలు, మెట్రో రైల్, సినిమా హాళ్లు, ఈత కొలనులు, వినోద పార్కులు, థియేటర్లు, బార్లు, ఆడిటోరియంలు, సమావేశ మందిరాలు, సామాజిక/రాజకీయ/క్రీడా/వినోద/విద్య/సాంస్కృతిక/మత పరమైన కార్యక్రమాలపై నిషేధం కొనసాగుతుంది. పరిస్థితి ఆధారంగా ఆయా కార్యకలాపాలు ప్రారంభించడంపై నిర్ణయం తీసుకుంటుంది కేంద్రం.
- రాత్రి పూట బయటకు వెళ్లొచ్చా?
లేదు. అత్యవసర కార్యకలాపాల కోసం మినహా రాత్రి 9 గంటల నుంచి ఉదయం 5 గంటల వరకు జన సంచారంపై నిషేధం అమల్లో ఉంటుంది.
- కంటైన్మెంట్ జోన్ల నిబంధనల్లో మార్పులు చేశారా?
జూన్ 30 వరకు కంటైన్మెంట్ జోన్లలో పూర్తిస్థాయి లాక్డౌన్ అమల్లో ఉంటుంది. కేంద్ర ఆరోగ్య శాఖ మార్గదర్శకాలకు అనుగుణంగా కంటైన్మెంట్ జోన్ల జాబితాను ఎప్పటికప్పుడు సవరించే బాధ్యత జిల్లా యంత్రాంగాలదేనని కేంద్రం తెలిపింది. కంటైన్మెంట్ జోన్లలో అత్యవసర సేవలకు మాత్రమే అనుమతి ఉంటుంది. ప్రజల రాకపోకలు నియంత్రించేందుకు కఠిన చర్యలు చేపట్టాలని సూచించింది.
కంటైన్మెంట్ జోన్ల సమీపంలో కేసులు పెరిగేందుకు అవకాశమున్న బఫర్ జోన్లను గుర్తించి, అవసరమైన ఆంక్షలు అమలు చేసే బాధ్యత కూడా జిల్లా యంత్రాంగాలదే అని స్పష్టం చేసింది కేంద్రం.
- వీటితోపాటు 65 ఏళ్లు పైబడిన వారు, పదేళ్లలోపు పిల్లలు, గర్భవతులు, ఆరోగ్య సమస్యలు ఉన్నవారు అత్యవసర, ఆరోగ్య అవసరాలు ఉంటే తప్ప ఇల్లు విడిచి బయటకు రావొద్దని సూచించింది ప్రభుత్వం.
- ఉద్యోగులంతా సాధ్యమైనంత వరకు ఆరోగ్య సేతు యాప్ను ఇన్స్టాల్ చేసుకునేలా చూడాలని యాజమాన్యాలకు తెలిపింది. ప్రజలంతా ఆరోగ్య సేతు యాప్ ఇన్స్టాల్ చేసుకుని, తమ ఆరోగ్య పరిస్థితిని ఎప్పటికప్పుడు అప్డేట్ చేసుకునే జిల్లా యంత్రాంగాలు సిఫార్సు చేయాలని పేర్కొంది.
