మహారాష్ట్ర ముంబయిలో దారుణం జరిగింది. గుండెనొప్పితో బాధపడుతున్న 56 ఏళ్ల వ్యక్తికి చికిత్స అందించటానికి వైద్యులు నిరాకరించారు. అతడ్ని మరో ఆస్పత్రికి తరలించేలోగా ప్రాణాలు కోల్పోయాడు.
ఏం జరిగింది?
నవీ ముంబయి వాషి ప్రాంతంలో నివసిస్తున్న జయదీప్ అనే న్యాయవాది.. ఏప్రిల్ 14న మధ్యాహ్న భోజనం చేసిన తర్వాత అకస్మారక స్థితిలోకి వెళ్లిపోయాడు.
"అతని నాడి వ్యవస్థను పరీశీలించాను. ఇంకా బతికే ఉన్నట్లు గుర్తించి వెంటనే అంబులెన్స్కు ఫోన్ చేసి స్థానిక ఆసుపత్రికి తరలించాము. కానీ ఆ ఆసుపత్రిలో కరోనా బాధితులకు మాత్రమే చికిత్స అందిస్తున్నారని, అత్యవసర విభాగం లేదని చెప్పారు. మున్సిపల్ ఆసుపత్రికి వెళ్తే వారు కూడా చేర్చుకునేందుకు నిరాకరించారు. చివరకు నెరుల్లోని మరొక ఆసుపత్రికి తరలించాము. కానీ అప్పటికే 30 నిమిషాలు ఆలస్యమైందని, ఆయన మరణించించారని వైద్యులు ధ్రువీకరించారు" అని జయదీప్ భార్య దీపాలీ( న్యాయవాది) వెల్లడించారు.
"లాక్డౌన్ సమయంలో కరోనా బాధితులకు తప్ప మరొకరికి చికిత్స అందించరా? అత్యవసరమైన చికిత్సను అందించకుండా వెనక్కి పంపటం సమంజసమా? సాధారణ చికిత్స విభాగాలను మూసివేస్తే ప్రజలు ఎక్కడికి వెళ్లాలి?" అని ఆమె ప్రశ్నించారు.
ఈ ఘటనకు సంబంధించి తన దగ్గర ఎటువంటి ఆధారాలు లేని కారణంగా చికిత్స అందించని ఆసుపత్రులపై చట్టపరమైన చర్యలు తీసుకోలేనని ఆవేదన వ్యక్తం చేశారు దీపాలీ.
