కశ్మీర్​లో ఆంక్షల సడలింపు.. అప్రమత్తంగా బలగాలు

ఆపరేషన్​ కశ్మీర్​ నేపథ్యంలో జమ్ముకశ్మీర్​లో విధించిన ఆంక్షలను సడలించారు అధికారులు. స్థానిక మసీదుల్లో శుక్రవారం ప్రార్థనలు చేసేందుకు అనుమతించారు. ఈ సందర్భంగా ఎలాంటి అవాంఛనీయ ఘటనలు జరకుండా భద్రతా బలగాలను అప్రమత్తం చేశారు. అన్ని ప్రాంతాల్లో హైఅలర్ట్​ ప్రకటించారు.

జమ్ముకశ్మీర్​కు ప్రత్యేక ప్రతిపత్తి కల్పించే అధికరణ 370, 35ఏల రద్దు నేపథ్యంలో విధించిన ఆంక్షలను కాస్త సడలించారు అధికారులు. శుక్రవారం స్థానిక మసీదుల్లో ప్రార్థనలు చేసుకునేందుకు అనుమతించారు. ఈ సందర్భంగా పెద్దఎత్తున నిరసనలకు దారి తీసే అవకాశం ఉందని భద్రతా బలగాలను అప్రమత్తం చేశారు. అన్ని ప్రాంతాల్లో హైఅలర్ట్​ ప్రకటించారు.

ఏ ఒక్క కశ్మీరీ వేధింపులకు గురికాకూడదని జాతీయ భద్రతా సలహాదారు అజిత్​ డోభాల్​ అధికారులకు సూచించారు. ఇప్పటికే శ్రీనగర్,​ దాల్​ లేక్​ ప్రాంతాల్లో ఆంక్షలు సడలించి ప్రజలను రోడ్లపైకి అనుమతించారు.

"శుక్రవారం స్థానిక మసీదుల వద్ద జనాలు సమావేశమయ్యే సందర్భంగా పెద్ద ఎత్తున ఆందోళనలు జరిగే అవకాశం ఉంది. దానికి తగ్గట్లుగానే అవసరమైన చర్యలు తీసుకున్నాం."
-భద్రతా అధికారి

ప్రజల అవసరాలు తీర్చాలి

జమ్ముకశ్మీర్ ప్రజలు రేషన్​, ఔషధాలు​ వంటి నిత్యవసరాలను తీసుకునేందుకు తగిన చర్యలు తీసుకోవాలని జిల్లా కలెక్టర్లను ఆదేశించారు గవర్నర్​ సత్యపాల్​ మాలిక్​. ప్రజలకు అందుబాటులో ఉండాలని సూచించారు. ప్రతి రోజు కనీసం 20 కుటుంబాలను కలిసి వారి సమస్యలను పరిష్కరించాలని కోరారు. ప్రజల అవసరాలు తీర్చేందుకు ప్రత్యేక వ్యాన్లు ఏర్పాటు చేయాలన్నారు.

జమ్ముకశ్మీర్​ వెలుపల ఉన్న వారి పిల్లలతో మాట్లాడేందుకు ప్రత్యేక టెలిఫోన్​ సౌకర్యం ఏర్పాటు చేయాలని గవర్నర్​ ఆదేశించారు. ఈ మేరకు శ్రీనగర్​లో 9419028242, 9419028251 హెల్ప్​లైన్​ నంబర్లను అందుబాటులోకి తెచ్చారు అధికారులు.

శ్రీనగర్​లో లెఫ్ట్​ నాయకులు అడ్డగింత...

సీపీఎం ప్రధాన కార్యదర్శి సీతారాం ఏచూరీ, సీపీఐ ప్రధాన కార్యదర్శి డి.రాజాను శ్రీనగర్​ విమానాశ్రయంలో భద్రతా సిబ్బంది అదుపులోకి తీసుకున్నారు. వారిని తిరిగి దిల్లీకి పంపించేశారు.

ఇదీ చూడండి: పోక్సో చట్టం కింద ఉన్నావ్​ నిందితుడు బుక్​