లోక్​సభ ఎన్నికల్లో పోటీ చేయట్లేదు: కమల్​

లోక్​సభ ఎన్నికల్లో పోటీ చేయడం లేదని మక్కల్​ నీది మయ్యం పార్టీ అధ్యక్షుడు కమల్​ హాసన్​ స్పష్టం చేశారు. పార్టీ తరపున పోటీ చేసేందుకు అన్ని నియోజకవర్గాల నుంచి భారీగా దరఖాస్తులు వచ్చినందుకే ఈ నిర్ణయం తీసుకున్నట్లు తెలిపారు. పోటీ చేసే వారంతా తన ప్రతి రూపాలుగా ఆయన అభివర్ణించారు.

త్వరలో జరగనున్న సార్వత్రిక ఎన్నికల్లో తాను పోటీ చేయడం లేదని మక్కల్​ నీది మయ్యం(ఎంఎన్​ఎం) పార్టీ అధ్యక్షుడు కమల్ హాసన్​ స్పష్టం చేశారు. కోయంబత్తూర్​లో జరిగిన ఓ బహిరంగ సభలో ఆయన ఈ ప్రకటన చేశారు.

లోక్​ సభతో పాటు 18 స్థానాల్లో అసెంబ్లీ ఉపఎన్నికలకు అభ్యర్థుల తుది జాబితాను కమల్ ప్రకటించారు. అందులో ఆయన​ పేరు మాత్రం లేదు. దీనిపై వివరణ ఇచ్చారీ సినీ నటుడు.

''నేను పోటీ చేయనందుకు ఎవరూ చింతించాల్సిన పని లేదు. ఎందుకంటే పార్టీ తరపున బరిలో దిగేవారంతా నా ప్రతి రూపాలే. అందరూ లక్ష్యసాధన కోసమే పని చేస్తారు''

- కమల్​ హాసన్​, మక్కల్​ నీది మయ్యం పార్టీ అధ్యక్షుడు

తమ పార్టీ తరపున గెలిచిన వారెవరైనా అవినీతికి పాల్పడినట్లు నిరూపితమైతే వెంటనే వారితో రాజీనామా చేయిస్తామని వెల్లడించారు కమల్.

ఈ సభలో ఎంఎన్​ఎం పార్టీ మ్యానిఫెస్టోలో ఆయన ప్రకటించారు. తమిళనాడులో తాగునీటి సమస్యకు శాశ్వత పరిష్కారం, పేదరిక నిర్మూలన చేస్తామని ప్రకటించారు. మురికి వాడలు లేని రాష్ట్రంగా తమిళనాడుని తీర్చిదిద్దుతామని పేర్కొన్నారు. అన్ని రంగాల్లో పురుషులతో పాటు మహిళలకు సమాన వేతనాలు ఇప్పిస్తామని మ్యానిఫెస్టోలో తెలిపారు.